“Qarabağ” Liqa mərhələsinə məğlubiyyətlə başladı - YENİLƏNDİ

Azərbaycan çempionu “Qarabağ” növbəti avrokubok oyununu keçirib.

TodayPress xəbər verir ki, Ağdam təmsilçisi Avropa Liqasının yeni formatda keçirilən Liqa mərhələsinin I turunda İngiltərədə “Tottenhem”in qonağı olub.

“Tottenhem Hotspur” qarşılaşması “Tottenhem”in 3:0 hesablı qələbəsi ilə başa çatıb.

Matç meydan sahibləri üçün yaxşı başlamayıb. 7-ci dəqiqədə referidən qırmızı vərəqə alan Radu Draqusin “Tottenhem”i azlıqda qoyub.

Amma buna baxmayaraq oyunda hesabı elə meydan sahibləri açıblar. 12-ci dəqiqədə Brennan Conson fərqlənib 1:0.

İlk yarını minimal hesabla qazanan “Tottenhem” 53-cü dəqiqədə hesabdakı fərqi 2 topa yüksəldib. Bu dəfə Pape Matar Sarr qol şansını qaçırmayıb.

“Qarabağ” 57-ci dəqiqədə qollardan birinin əvəzini çıxa bilərdi. Toral Bayramov penaltini dəqiq yerinə yetirə bilməyib. 

Matçın yekun nəticəsini isə 68-ci dəqiqədə Dominik Solanke müəyyən edib.

“Qarabağ” UEFA Avropa Liqasının Liqa mərhələsinin II turunda, oktyabrın 3-də İsveç təmsilçisi “Malmö” ilə qarşılaşacaq. Qarşılaşma Tofiq Bəhramov adına Respublika stadionunda keçiriləcək.

***

00:29

UEFA Avropa Liqasının Liqa mərhələsinin I turunun "Tottenhem" (İngiltərə) - "Qarabağ" oyununda ilk hissə başa çatıb.

TodayPress xəbər verir ki, "Tottenhem Hotspur" stadionundakı matçın 12-ci dəqiqəsində meydan sahiblərinin heyətində Brennan Conson fərqlənib.

 London təmsilçisi meydanda 10 nəfərlə mübarizə aparır. 7-ci dəqiqədə Radu Drequşin qırmızı vərəqə ilə cəzalanıb.

İlk hissə  "Tottenhem Hotspur" klubunun 1:0 qələbəsi ilə başa çatıb.

***

23:37

UEFA Avropa Liqasının Liqa mərhələsinin I turunun "Tottenhem" (İngiltərə) - "Qarabağ" oyunu start götürüb.

TodayPress xəbər verir ki, qarşılaşma "Tottenhem Hotspur" stadionunda keçirilir.

Matçı fransalı baş hakim Villi Delajo idarə edir.

 ***

23:15

“Qarabağ”ın  Avropa Liqasının 1-ci turu çərçivəsində “Tottenhem”lə keçiriləcək oyunu nəzərdə tutulduğu vaxtdan gec başlayacaq.

TodayPress xəbər verir ki, oyunun gec başlanmasına səbəb avtobusun tıxacda qalmasıdır.

Qeyd edək ki, qarşılaşma Bakı vaxtı ilə saat 23:00-da başlamalı idi.