AL: “Tottenhem” və “Mançester Yunayted” finala yüksəldilər

UEFA Avropa Liqasında (AL) finalçılar məlum olub.   

TodayPress xəbər verir ki, mayın 21-də baş tutacaq həlledici Bilbao qarşılaşmasına İngiltərənin iki klubu vəsiqə qazanıb. 

Liqa mərhələsində Azərbaycan çempionu "Qarabağ"ın rəqibi olan “Bodo-Qlimt” və “Tottenhem” komandaları  yarımfinal mərhələsinin cavab oyunu çərçivəsində Norveçdə üz-üzə gəliblər. 

Ilk oyunda 3:1 hesablı qələbə qazanan ingilislər, səfər qarşılaşmasında da rəqibdən üstün olublar.

Görüş “Tottenhem” 2:0 hesablı qələbəsi ilə başa çatıb. London təmsilçisinin heyətində Solanke və Porro fərqlənib.   

Digər yarımfinal matçında “Mançester Yunayted” “Old Trafford”da “Atletik”i qəbul edib.

Qonaq komanda erkən qol vursa da, “qırmızı şeytanlar” 4 cavabsız qolla cütün taleyini həll ediblər.

Mançester təmsilçisinin heyətində Maunt dubl edib, Kazemiro və Hoylund isə hərəyə bir dəfə fərqləniblər.   

Namiq HUN