Şaraa Əsədin tarixi səhvini təkrarlayıb? - POLİTOLOQ RƏYİ

“Suriyanın keçid dövrü prezidenti Əhməd əl-Şaraa yeni kabinetinin tərkibində xristian, ələvi, kürd, druzi, hətta qadın LGBT fəalına yer verməklə türkmənlərə haqsızlıq edib”. 

Politoloq Turan Rzayev bunu TodayPress-ə danışarkən deyib. 

O, əl-Şaraanın yeni kabinetin tərkibinə diqqət çəkib:

“Keçid hökumətində XİN başçısı Əsəd Həsən əş-Şeybani və müdafiə naziri Murhaf Əbu Qəsr öz vəzifələrini qoruyublar. Baş Kəşfiyyat Xidmətinin rəhbəri postunu tutan Ənəs Həsən Xəttab isə daxili işlər naziri təyin edilib. Şaraa Qəsr əş-Şaab sarayında çıxışında yeni tərkibi “dəyişiklik hökuməti” adlandırıb. Əslində “dəyişiklik hökuməti” ifadəsi olduqca diqqət çəkir. Bu ifadə 22 nəfərlik kabinetin tərkibindəki 4 şəxslə bağlıdır: kürd əsilli təhsil naziri Əbdülrəhman Turko, ələvi nəqliyyat naziri Yarub Badr, druzi kənd təsərrüfatı naziri Amjad Badr, nəhayət xristian və LGBT fəalı sosial işlər naziri Hind Kabavat. Göründüyü kimi, Şaraanın yeni kabinetinin tərkibində xristian, ələvi, kürd, druzi, hətta qadın LGBT fəalına belə yer verilib. Lakin bununla belə, Suriyanın əsas aparıcı etnik azlığı olan türkmənlərə yer verilməyib”.

Analitik diqqətə çatdırıb ki, Əbdülrəhman Turkonun soyadındakı “Turko”  türkmən kimliyinin ifadəsi deyil, o, kürddür. Həmçinin Türkiyədə təhsil alan XİN başçısı Əsəd Həsən əş-Şeybani də türkmən deyil. 

“Əhməd əl-Şaraa açıq şəkildə türkmənlərə haqsızlıq edib və bu, bir daha Suriyada türkmənlərə münasibəti göz önünə sərir. Halbuki Şaraaya vətəndaş müharibəsinin gedişində ən böyük dəstəyi məhz türkmənlər vermiş, kürdlər, druzilər, ələvilər isə son ana qədər mübarizə aparmışdı”. 

T.Rzayev əlavə edib ki, hazırda ölkədə nisbi sakitlik olsa da, kürd, druzi və ələvilərin perspektivdə Suriyanın başına bəla olması qaçınılmazdır.

“Nəticə etibarilə Əhməd əş-Şaraanın hökumət kabinetində türkmən nümayəndəyə yer verməməsi “dəyişiklik hökuməti” adlandırdığı hökumətin heç də dəyişmədiyini göstərir. Əsəd dövründə olduğu kimi, Suriya türkmənləri yenə ayrı-seçkiliyə məruz qalır. Təcrübə göstərir ki, türkmənlərə etnik ayrı-seçkilik edən Bəşər Əsəd sonda vətəndaş müharibəsinin həlledici faktoru olan Suriya türkmənləri tərəfindən devrildi. Əhməd əş-Şaraa da Suriya türkmənlərinə üz çevirərək, gələcəyi üçün riskli bir addım atır” deyə o, nitqini sonlandırıb.

Qeyd edək ki, martın 30-da Suriyanın keçid dövrü prezidenti Əhməd əl-Şaraa ölkədə yeni hökumətin formalaşdığını açıqlayıb.

Hökumətə 23 texnokrat nazir, o cümlədən biri qadın Hind Kabvat daxildir.  Suriya lideri əmin edib ki, ölkə tarixində yeni səhifə açılıb.

O, güclü və sabit dövlət quracağına söz verib və korrupsiyanın heç bir dövlət qurumuna nüfuz etməsinə imkan verməyəcəyini vurğulayıb.

Töhfə Səməd