Paşinyan üçün "son zəng çalınır": "Nikolun taleyi sülhə yanaşmasından asılıdır" - TƏHLİL

“Ermənistanda daxili siyasi ab-hava kifayət qədər gərgindir və bu, bilavasitə Azərbaycan və Ermənistan arasında sülh prosesinə də təsir göstərir”.

Politoloq İlyas Hüseynov bunu TodayPress-ə açıqlamasında deyib.

O, Ermənistandakı seçki mühiti və onun sülh prosesinə təsirinə diqqət çəkib:

“Uzun illər ərzində Ermənistanda baş tutan seçki mənzərələrinə baxanda deyə bilərik ki, bütün bu proseslər iki dövlət arasında olan nizamlanmaya da bu və ya digər formada təsir göstərib. Hətta bələdiyyə seçkilərindən tutmuş, hökumət başçısı və prezident seçkilərinə qədər bütün mərhələlərdə gedən proseslər bilavasitə dayanıqlı sülhə, sabitliyə təsir göstərib. Hazırkı reallıqlarda bu aydın şəkildə özünü göstərir və müharibədə məğlub olan Ermənistanın Baş naziri Nikol Paşinyana ictimai reaksiyalar güclənir. Bu da onun tərəddüdlü siyasət yürütməsindən irəli gəlir.

O, bir tərəfdən sülhə sadiq olduğunu açıqlayır, digər tərəfdən Azərbaycanın tələblərini ya yerinə yetirmir, ya da bu prosesi ləngitməklə məşğuldur. ATƏT-in Minsk qrupunun buraxılması, Ermənistan Konstitusiyasının dəyişdirilməsi əsas tələblər olsa da, sanki Paşinyan məsələlərdə tələsmək istəmir. Bunun özü də ictimai rəyə neqativ təsir göstərən məqamdır”.

Ekspert Ermənistanın daxilində baş verən parçalanma meyillərinin Paşinyan üçün ciddi təhlükə yaratdığını bildirib:

“Hesab edirəm ki, Ermənistanın hakim siyasi dairələrində təmsil olunan şəxslərin “Vətəndaş Müqaviləsi” partiyasından çıxaraq özlərinə müxalif bir düşərgə formalaşdırması və yaxud “Qarabağ klanı”nın keçmiş üzvlərinə qoşulması Nikol Paşinyanın siyasi karyerasına mənfi təsir göstərə bilər". 

Politoloq qarşıdan gələn parlament seçkilərinin Ermənistanın siyasətinə təsirindən də danışıb:

“2026-cı ildə Ermənistanda keçiriləcək parlament seçkilərinin müddəti yaxınlaşdıqca bu cür ehtimallar, ssenarilər, mülahizələr güclənir və bunun özü də ictimai rəy sorğularının nəticələrində əks olunur. 

Hakimiyyətdə olan, tərəddüdlü siyasət yürüdən qüvvəyə etimad azalıb. Baqrat Srbazan, “Qarabağ klanı”nın üzvləri, kənar dəstək, Ermənistanda xaos, anarxiya axtarışında olan qüvvələr Paşinyana qarşı demarş etsələr də, bir nəticəni əldə edə bilmirlər. Çünki Nikol Paşinyan 2018-ci ildən bu yana təsir rıçaqlarını və özü üçün siyasi portreti formalaşdırıb. Lakin sanki bu nöqtədən sonra siyasi imicinə nəsə qata bilməyən Paşinyan qarşıdakı dövrdə çətin vəziyyətlə üzləşə bilər”.

İ.Hüseynov hesab edir ki, Paşinyanın siyasi taleyi onun sülhə yanaşmasından asılı olacaq. 

Qeyd edək ki, Ermənistanda hakim “Vətəndaş Müqaviləsi” partiyasının daxilində 2026-cı ildə hakimiyyətin itiriləcəyi ilə bağlı fikirlər səsləndirilir. Belə ki,  Ermənistan Baş naziri Nikol Paşinyanın partiyası martın 30-da ölkənin ikinci ən böyük şəhəri Gümrüdə keçirilən bələdiyyə seçkilərində ən çox səs toplamasına baxmayaraq, şəhərə nəzarəti itirmək riski ilə üzləşib. Sorğular isə partiyanın reytinqinin 12 faizdən aşağı olduğunu göstərir. 

Qiymət Mahir