“Gürcüstanda qütbləşmə dərinləşə bilər” – POLİTOLOQ RƏYİ

“Gürcüstanda hakim "Gürcü Arzusu" partiyası, müxalifət tərəfindən Rusiyaya meylli siyasət aparmaqda günahlandırılır, əhalinin əksəriyyəti isə Avropa İttifaqı və NATO üzvlüyünü dəstəkləyir”.  

Azərbaycan Yəhudi Media Mərkəzinin politoloqu Rüstəm Tağızadə bunu Gürcüstanda “Xarici təsirin şəffaflığı haqqında” qanunun Amerika variantının qəbulu haqqında TodayPress-ə danışarkən deyib. 

Onun sözlərinə görə, qanun ölkə daxilində qütbləşməni dərinləşdirə bilər: 

“Xüsusilə, Aİ öz tənqidlərini Gürcüstanın üzv olma perspektivləri ilə birbaşa əlaqələndirdikdə, bu, ölkə daxilində narazılıqlar daha çox artıracaq. Qeyri Hökumət Təşkilatları (QHT) və müstəqil media – keçmiş etirazların əsas aparıcıları – çox güman ki, qanunu vətəndaş azadlığına hücum kimi qələmə verərək müqavimət göstərəcəklər.  Məqsədli icra müxalifəti daha da gücləndirə bilər”.

Analitik diqqətə çatdırıb ki, etirazçılara qarşı sərt taktikalar, məsələn, həbslər, senzuralar gərginliyi artıra, güzəştlər isə onları zəiflədə bilər. Lakin ictimai qınaqlara və aksiyalara baxmayaraq, hökumətin qanuna sadiqliyi kritik olacaq:

“Qərbin atacağı addımlar, dəstək nümayişləri etirazçıları daha çox cəsarətləndirə bilər.  Lakin, əgər qanun ABŞ-Aİ normalarına uyğun olarsa, əks reaksiyalar susdurula bilər – baxmayaraq ki, bu, Gürcüstanın özünəməxsus həssaslıqlarını nəzərə alsaq, olduqca çətin görünür”.

Politoloqun fikrincə, hər bir halda etirazların alovlanması və yeni qarşıdurma cəbhələrinin yaranması qaçılmazdır. Mitinqlərin neçə müddət davam edəcəyi və miqyası isə hökumətin güzəştə getmək istəyindən, müxalifətin səfərbərlik qabiliyyətindən və beynəlxalq reaksiyalardan asılıdır. Bununla belə, qanun tənqidi səsləri hədəf almadan həyata keçirilərsə, iğtişaşlar məhdud qala bilər. 

“Bütün bunlarla yanaşı, nəzərə almaq lazımdır ki, Gürcüstanda hazırda rusiyayönümlü hakimiyyətin siyasi xətti daha güclüdür” deyə o, sonda vurğulayıb. 

Qeyd edək ki, Gürcüstan parlamenti “Xarici təsirin şəffaflığı haqqında” qanunun Amerika variantını qəbul edib. Qanunun qəbul edilməsinə 86 deputat səs verib. 

Töhfə Səməd