Fransanın neokolonial siyasətindən əziyyət çəkən Korsika: Pontifikin bölgəyə səfəri nəyi dəyişəcək? - ŞƏRH

“Hər hansısa dini simanın və ya Avropadan gələn siyasi xadimin Korsikaya səfəri o zaman öz nəticəsinə çatmış olar ki, burada reallıq və ədalət meyarlarına xidmət olunsun”. 

Bunu TodayPress-ə danışan politoloq Tural İsmayılov deyib. Onun sözlərinə görə, Fransanın tarix boyu apardığı neokolonial siyasət nəticəsində Korsika cəmiyyəti böyük acılar və ağrılar yaşayıb. 

“Bu gün də Makron hakimiyyəti haqsız formada orada öz mövcudluğunu davam etdirir. Həm də ada sakinləri istər etnik, istərsə də milli düşüncə cəhətdən Fransa ilə heç bir aidiyyatı olmayan xalqdır. Məhz buranın tarixi keçmişi də Fransanın istismarçı siyasətinin Avropadakı məntəqələrindən biri kimi xarakterizə edilə bilər”. 

Analitikin fikrincə, Roma Papasının Korsikaya səfərində hər hansısa xüsusi bir nəticə əldə edilməyəcək. Çünki orada ada sakinlərinin haqq səsinə səs verəcək və yaxud da ümumiyyətlə insan haqları məsələsini qaldıracaq bir vəziyyət müşahidə edilməyəcək. 

“Avropa Parlamenti və AŞPA kimi saxtakar təşkilatların heç birində bu günə qədər nə Fransa tərəfindən Korsikada həbsə atılan fəallarının məsələləri ilə bağlı rəsmi Parisə etiraz edilib, nə də onların taleyi məsələsi bu platformalarda qaldırılıb” deyə o, əlavə edib. 

Bununla yanaşı, ekspert məsələnin müsbət tərəflərinə də diqqət yetirib. Onun qənaətincə, ola bilsin ki, korsikalılar arasında hansısa bir niyyət sorğusu həyata keçirilsin. Çünki korsikalılar etnik baxımdan italyanlara daha yaxındırlar. Onlar Etruskların törəmələrindən hesab edilir. Hətta gələcəkdə İtaliyanın Korsikadakı mövcudluğuna daha kəskin etiraz etməsi gözləniləndir. Həmçinin Roma Papasının səfəri zamanı İtaliyanın müəyyən fikirləri burada səslənə bilər.

Məlum olub ki, dekabrın 15-də Roma Papası Korsikaya səfər etməyi planlaşdırır. Buna əsasən Bakı Təşəbbüs Qrupu (BTQ) Müqəddəs Papa Fransisk Apostolikə məktub ünvanlayaraq Korsikanın dekolonizasiyası prosesinə dəstək üçün müraciət edib.  

Töhfə Səməd