"Ermənistan konstitusiya məsələsində kamuflyaj edir" - Politoloq AÇIQLADI

“Rəsmi İrəvan Ermənistan konstitusiyası üzərində işin Bakının diktəsi ilə deyil, öz istəkləri ilə həyata keçirildiyini göstərməyə çalışır".

Politoloq Turan Rzayev bunu TodayPress-ə  açıqlamasında deyib.

O, Ermənistanın ədliyyə naziri Srbui Qalyanın Ermənistanın konstitusiyası ilə bağlı fikirlərinə diqqət çəkib:

“Nazir deyib ki, yeni Konstitusiya üzərində iş gedir və proses 2026-cı il seçkilərinə qədər tamamlanmalıdır. Sənəd, insan hüquqlarını, sosial-iqtisadi hüquqları, idarəçilik qaydalarını və dövlət orqanlarının rolunu tənzimləyəcək. Onun sözlərinə görə, Avropa İttifaqı (Aİ) ilə yaxınlaşma çərçivəsində artıq 30-dan çox qanun layihəsi uyğunlaşdırılıb və proses davam edəcək”.

Analitikin sözlərinə görə, Ermənistan konstitusiyası üzərində iş gedir (yenilənir) və proses 2026-cı ilə qədər tamamlanmalıdır.

Turan Rzayev xatırladıb ki, Ermənistan konstitusiyası və müstəqillik bəyannaməsində Azərbaycan və ətraf ölkələrə ərazi iddiasını əks etdirən bəndlərin dəyişdirilməsi rəsmi Bakının sülhlə bağlı tələbləri arasındadır.

"Azərbaycan rəsmi İrəvanın gələcəkdə sülhdən yayınmaq ya da işğal cəhdini daxili hüquqla leqallaşdırılmasının qarşısını almaq üçün bu tələbi irəli sürüb. Ermənistan tərəfi əvvəllər bundan yayınmaq istəsə də, görünür, Bakının tələbini yerinə yetirməli olduğunu başa düşüb.

Lakin S.Qalyanın dediyindən bu qənaətə gəlmək olur ki, guya İrəvan prosesi Bakının diktəsi ilə deyil, öz istəyi ilə həyata keçirir. Misal üçün, yeni sənəddə insan hüquqlarını, sosial-iqtisadi hüquqları, idarəçilik qaydalarını və dövlət orqanlarının rolunun tənzimlənib Aİ ilə yaxınlaşma çərçivəsində 30-dan çox qanun layihəsinin uyğunlaşdırıldığı deyilir. Yəni bunu Ermənistan konstitusiyasını Aİ-yə inteqrasiya və daxili hüquqi boşluqların tənzimlənməsi kimi təqdim edir. Bakının tələblərindən isə söz açmır”.

Politoloqun fikrincə, Ermənistanın yeni konstitusiyasında ətraf ölkələrə ərazi iddiasını ehtiva edən bəndlər də çıxarılacaq. Lakin Ermənistanın Baş naziri Nikol Paşinyan və komandası bunu açıq şəkildə deyib, müxalifətin narazılığına tuş gəlmək istəmir. Buna görə də məsələni yuxarıdakı tərzdə kamuflyaj edir.

“Prinsipcə prosesin hansı adda aparılması Bakı üçün önəmli deyil. Bizim üçün vacib olan həqiqətən də tələblərin yerinə yetirilməsidir. İrəvan bunu edəcəksə, bu, sülhün davamlılığı baxımından mühüm hadisə ola bilər” deyə o nitqini yekunlaşdırıb.

Qeyd edək ki, 2026-cı ildə Ermənistanda keçiriləcək parlament seçkilərindən sonra yeni Konstitusiyanın qəbulu ilə bağlı referendum baş tutacaq.

Töhfə Səməd