Ermənistan Azərbaycanı KTMT-yə çəkməyə çalışır? : “Rəsmi Bakı bundan sonra da…”

“Azərbaycanın Kollektiv Təhlükəsizlik Müqaviləsi Təşkilatına ( KTMT) üzv olmaq kimi bir niyyəti yoxdur”.

 Politoloq Oqtay Qasımov bunu TodayPress-ə danışarkən bildirib.

Onun sözlərinə görə,  Azərbaycan bu təşkilat yaranandan ona üzvlükdə maraqlı olmayıb, bundan sonra da olmayacaq:

“Azərbaycan öz ordusunu Türkiyə standartlarında qurub və onu inkişaf etdirir. Təbii ki, Ermənistan xaric KTMT-yə üzv olan ölkələrlə həm Mərkəzi Asiyanın Qazaxıstan, Qırğızıstan, Tacikistan kimi ölkələri ilə ,o cümlədən, Belarus və Rusiya ilə çox yaxşı münasibətlərimiz var. Bu baxımdan hazırda Azərbaycanın KTMT-də ağırlığı Ermənistandan qat-qat çoxdur”. 

Analitik vurğulayıb ki, Azərbaycan bu məsələlərdə ikitərəfli münasibətlərə üstünlük verir və hansısa bloklara qoşulmaq niyyəti yoxdur. 

Qeyd edək ki, “Mənim ölkəm, mənim Ermənistanım” hərəkatının rəhbəri Mher Avetisyan Rusiya-Ermənistan forumunda bildirib ki, Ermənistan Rusiya ilə birgə layihələrdə daha yaxından iştirak etməli, həmçinin Azərbaycanın Kollektiv Təhlükəsizlik Müqaviləsi Təşkilatına (KTMT) daxil olmasına nail olmalıdır. O, hesab edir ki, Bakının KTMT-yə daxil olması regionda yeni münaqişənin qarşısını almağa kömək edəcək.

Günəş Mərd