Xırdalanda 14 mərtəbəli binada yanğın baş verdi

Fövqəladə Hallar Nazirliyinin (FHN) “112” Qaynar xəttinə Abşeron rayonunun Xırdalan şəhəri, H.Aslanov küçəsində çoxmərtəbəli yaşayış binasında yanğın baş verməsi barədə məlumat daxil olub.

TodayPress nazirliyin mətbuat xidmətinə istinadən xəbər verir ki, məlumatla əlaqədar FHN-in Dövlət Yanğından Mühafizə və Xüsusi Riskli Xilasetmə xidmətlərinin qüvvələri dərhal əraziyə cəlb olunublar.

Hadisə yerində əməliyyat şəraiti qiymətləndirilərkən 14 mərtəbəli binanın şaxtası boyunca elektrik naqillərinin yandığı müəyyənləşdirilib.

Yanğınsöndürənlərin operativ müdaxiləsi sayəsində yanğının yayılmasına, o cümlədən mənzillərə keçməsinə imkan verilmədən qısa müddətdə söndürülüb.

Bina sakinləri təhlükəsizlik tədbirləri çərçivəsində FHN-in qüvvələri tərəfindən təxliyə olunub.