Hövsanda monitorinq keçirildi, ölçmə işləri aparıldı – RƏSMİ AÇIQLAMA

Suraxanı rayonu Hövsan qəsəbəsində vətəndaşlar ətrafa yayılan üfunət qoxusundan şikayətçidir. Redaksiyamıza daxil olan şikayətlərlə bağlı bir sıra rəsmi qurumlara müraciət etdik.

Ekologiya və Təbii Sərvətlər Nazirliyi tərəfindən TodayPress-ə verilən açıqlamaya görə, Xəzər Kompleks Ekoloji Monitorinq İdarəsinin mütəxəssisləri tərəfindən sözügedən ərazidə monitorinq keçirilib və ölçmə işləri aparılıb:

“Monitorinq müddətində ərazidə spesifik iy-qoxu müşahidə olunsa da, hava keyfiyyəti üzrə aparılan ölçmə işlərinin nəticələrinə əsasən atmosfer havasında zərərli qaz qarışıqlarının miqdarı yol verilən hədd daxilində olub”.

İdarə rəisi Ceyhun Muradov bildirib ki, ilkin ehtimala görə, iy-qoxuya səbəb havaların isti keçməsi nəticəsində ərazidə yerləşən Hövsan aerasiya stansiyasındakı tullantı sularının buxarlanmasıdır.

Töhfə Səməd