Gürcüstan uğrunda savaş: Zurabaşvilini Saakaşvilinin aqibəti gözləyir? - ŞƏRH

“Hazırda Qərb və Rusiya aktiv olaraq Gürcüstan uğrunda siyasi mübarizəyə başlayıblar. Hər iki tərəf Gürcüstanın itirilməməsi üçün bütün siyasi alətlərdən istifadə edirlər”.

Bunu TodayPress-ə verdiyi açıqlamada politoloq Amid Əliyev deyib. Onun sözlərinə görə, 2003-cü il inqilabından sonra Gürcüstan rəsmi olaraq Qərbə yönəlmiş siyasət kursunu seçib və aktiv olaraq Avro-Atlantik məkana inteqrasiya prosesinə başlayıb:

“Bu, təbii ki, Rusiyanın bölgədəki maraqlarına tam şəkildə zidd idi. Nəticədə rəsmi Tbilisi ərazisinin 20 %-nin Rusiya tərəfindən ilhaqı ilə qarşılaşdı. Bu da öz növbəsində Gürcüstanın milli maraqlarına və təhlükəsizliyinə tam şəkildə ciddi təhlükə yaratdı. Keçən müddət ərzində Gürcüstan öz ərazilərini geri qaytara bilmədi. Qərb tərəfindən dəstəklənən hakimiyyət bu siyasətə uyğun olaraq Rusiya ilə mövcud bütün əlaqələri kəsdi. Bütün bunlar ən sonda sabiq prezident Mixeil Saakaşvilinin acı taleyi ilə nəticələndi”.

Analitikin qənaətincə, indiki məqamda Gürcüstanda baş verən siyasi proseslər olduqca ziddiyyətlidir. Belə ki, qərbyönümlü Salome Zurabaşvili Rusiya tərəfindən dəstəklənən siyasi xətti və namizədi, Mixeil Kavelaşvili rəsmən tanımır:

“Bütün ciddi cəhdlərə baxmayaraq Gürcüstanın qərbyönümlü hakimiyyəti ölkədə Rusiyanın siyasi intervensiyasına qarşı çıxa bilmədi. Nəticədə “xarici agentlər” haqqında qanun ratifikasiya olundu. Bununla da Qərbin Gürcüstanı dəstəkləmə prosesi qırıldı. Ardınca Rusiyaya sadiq olan Kavelaşvili prezident kimi təsdiqləndi. Bununla da Gürcüstan öz xarici siyasət kursunu rəsmən dəyişdiyini bəyan etmiş oldu”.

A.Əliyev diqqətə çatdırıb ki, hazırda ölkədə Zurabaşvili və yeni seçilmiş Kavelaşvilinin mövcud hakimiyyəti arasında ciddi dilemma yaşanır. Əgər Saakaşvilinin dövründə siyasi hakimiyyət və xalq Qərbi dəstəkləyirdisə, indi vəziyyət tamamilə dəyişib, siyasi hakimiyyət Rusiya yönünü seçib. Nəticədə yaranmış ikitirəlik Gürcüstanda dərin siyasi böhrana səbəb olub. Baş verən siyasi dəyişikliklə razılşamayan qərbyönümlü Zurabişvilinin taleyi isə təhlükə altındadır: 

“Ümumiyyətlə Qərbin Gürcüstanın ərazi bütövlüyünün bərpası istiqamətində ciddi addım atmaması, lakin Rusiyanın qısa müddətdə siyasi hakimiyyəti öz təsir dairəsinə salmağı bacarmağı Zurabişviliyə bir siqnal olmalıdır. Rusiya öz namizədini legitim və dayanqlı olması üçün hər bir addıma əl ata bilər. Hətta Saakaşvilidən də ağır tale Zurabişvilini gözləyə bilər”. 

Politoloq sonda vurğulayıb ki, bütün bu ehtimallara baxmayaraq, nəzərə almaq lazımdır ki, Gürcüstanın hazırki addımları milli maraqların qorunmasına və ərazisinin tam şəkildə bərpa olunmasına hədəflənib. Bu yolda isə siyasi mübarizədə buna qarşı çıxan istənilən aktor tam şəkildə zərərsizləşdiriləcək.

Qeyd edək ki, Gürcüstanın sabiq prezidenti Salome Zurabişvili 29 dekabrdan sonra Gürcüstanın prezidenti mandatını təhvil verməyəcəyini bəyan etmişdi. İndi də o, onu "keçmiş prezident" adlandıranlara qəzəblənib və Gürcüstanın tək legitim liderinin özü olduğunu bildirib. 

Töhfə Səməd