Eşitmə itkisi yaşlılarda demensiya riskini ciddi artırır

ABŞ-nin dörd müxtəlif icmasında aparılan genişmiqyaslı araşdırma eşitmə itkisi ilə demensiyanın inkişafı arasında sıx əlaqəni bir daha sübut edib. 

TodayPress xəbər verir ki, bu barədə “JAMA Otolaryngology–Head & Neck Surgery” jurnalında yazılıb. 

Tədqiqat təxminən 3000 yaşlı iştirakçının uzunmüddətli tibbi müşahidə qeydlərinə əsaslanaraq aparılıb.

Tədqiqatçılar, o cümlədən Con Hopkins Universiteti və Nyu-York Universitetindən olan mütəxəssislər bildiriblər ki, bu, ABŞ-də ilk dəfə bu miqyasda aparılan və klinik müşahidələrə əsaslanan araşdırmadır. Onların sözlərinə görə, nəticələr eşitmə itkisi ilə demensiya arasında əvvəlki ehtimalları daha da gücləndirir və yaşlı əhali arasında eşitmə problemləri ilə mübarizənin nə qədər vacib olduğunu vurğulayır.

Təhlil çərçivəsində orta yaşı 75 olan 2946 nəfərin son 38 ildə toplanmış məlumatları və son 8 illik müşahidə göstəriciləri araşdırılıb. Bu şəxslərdə müxtəlif dərəcələrdə eşitmə itkisi təsdiqlənib və nəticələr göstərib ki, demensiyanın yeni halları arasında hər üç nəfərdən biri bu problemin klinik cəhətdən əhəmiyyətli eşitmə itkisi ilə əlaqəli ola bilər.

Əvvəlki araşdırmalarda eşitmə qabiliyyəti zəif olan yaşlıların demensiyaya daha çox məruz qaldığı, eyni zamanda qulaqcıq (eşitmə aparatı) istifadə edənlərdə bu riskin əhəmiyyətli dərəcədə aşağı olduğu bildirilmişdi. Lakin bu dəfəki araşdırma əlaqənin güclü olduğunu göstərsə də, səbəb-nəticə münasibətini hələ tam təsdiqləmir.

Mütəxəssislər çağırış edirlər ki, yaşlı əhali arasında eşitmə müayinələri və müdaxilələr sistematik şəkildə genişləndirilməlidir, çünki bu, həm demensiyanın qarşısının alınması, həm də ümumi həyat keyfiyyətinin yüksəldilməsi baxımından mühüm rol oynaya bilər.

Qiymət Mahir