Çin alimləri “rəqəmsal böyrək” layihəsini təqdim etdi

Pekin Universitetinin tədqiqatçıları böyrəyin hərtərəfli rəqəmsal atlasını yaratmaq üçün süni intellekt və multimodal görüntüləmə texnologiyasından istifadə edən “Böyrək İmageomika Layihəsi”ni işə salıblar.

TodayPress xəbər verir ki, tədqiqatın nəticələri “National Science Review” jurnalında dərc olunub.

Bildirilib ki, bu “rəqəmsal böyrək” böyrək xəstəliklərinin mexanizmlərinin daha dəqiq vizuallaşdırılmasına imkan verəcək, erkən diaqnostika, yeni dərmanların hazırlanması və fərdi müalicələr üçün yeni perspektivlər açacaq.

Xroniki böyrək xəstəlikləri (XBX) tez-tez ilkin mərhələdə aşkar edilmir, çünki xəstəliyin aydın klinik əlamətləri və etibarlı biomarkerləri azdır. Bu səbəbdən xəstələrin əksəriyyəti böyrək funksiyasının əhəmiyyətli dərəcədə pozulmasından sonra diaqnoz alır.

Problemin həlli üçün Milli Biotibbi Görüntüləmə Mərkəzi (NBIC) və Pekin Universitetinin Birinci Xəstəxanası “rəqəmsal böyrək” təşəbbüsünü irəli sürərək multidissiplinar texnologiyaları birləşdirən innovativ diaqnostika üsulu hazırlayıb. Bu platforma böyrəyin molekulyar səviyyədən orqan sisteminə qədər bütün quruluşunu əhatə edən multimiqyaslı vizuallaşdırma imkanı yaradır.

“Rəqəmsal böyrək” texnologiyası dinamik simulyasiya, panoramik vizuallaşdırma və çoxölçülü təhlil kimi əsas xüsusiyyətlərə malikdir. Bu, böyrəyi sanki şəffaf bir orqan kimi təqdim edərək, ənənəvi patoloji müayinələrin məkan və informasiya məhdudiyyətlərini aradan qaldırır. Pekin Universitetinin Birinci Xəstəxanasının vitse-prezidenti Yanq Li bildirib ki, “rəqəmsal böyrək” klinik praktikada lezyonun mənbəyini dəqiq müəyyənləşdirmək və xəstənin klinik məlumatlarını birləşdirərək fərdi model qurmaq imkanı yaradır.

Bu isə ən uyğun müalicə üsulunun seçilməsinə, erkən diaqnostikanın təkmilləşdirilməsinə və fərdi müalicənin effektivliyinin artırılmasına kömək edəcək. Alimlər üç il ərzində rəqəmsal heyvan böyrəyi, on il ərzində isə rəqəmsal insan böyrəyi yaratmağı hədəfləyirlər. Hazırda onlar ultrasəs, “MRT”, “KT” və patoloji görüntüləri daxil olmaqla müxtəlif görüntüləmə üsullarından əldə edilən məlumatları uğurla inteqrasiya ediblər. 

Qiymət Mahir