Avropa Komissiyası Azheimer dərmanına icazə verdi

Avropa Komissiyası uzun müddətdir gözlənilən “Leqembi” dərmanının Aİ-də satışına rəsmi icazə verib. Qərar Avropa Dərman Agentliyinin (EMA) müsbət elmi rəyindən sonra təsdiqlənib. 

TodayPress xəbər verir ki, məlumatı “AFP” yayıb.

Dərman ABŞ-nin “Biogen” və Yaponiyanın “Eisai” şirkətləri tərəfindən hazırlanıb və aktiv maddə kimi lekanemab ehtiva edir. Bu preparat Azheimer xəstəliyinin erkən mərhələlərində yaddaş və idrak qabiliyyətlərindəki pozuntularla mübarizə üçün nəzərdə tutulub. “Leqembi” Aİ-də bu kateqoriyada təsdiqlənən ilk preparatdır.

Avropa Komissiyası bildirib ki, EMA müvafiq pasiyent qrupunda dərmanın faydalarının potensial riskləri üstələdiyi qənaətinə gəlib. Bununla belə, dərmanın istifadəsi üçün ciddi şərtlər və riskin minimuma endirilməsi üzrə tədbirlər müəyyən olunub.

Xüsusilə qeyd olunub ki, “Leqembi” yalnız beyin qanaxması riski aşağı olan xəstələr üçün tövsiyə edilir. Buraya ApoE4 geninin bir nüsxəsinə və ya heç bir nüsxəsinə sahib olmayan pasiyentlər daxildir – bu gen Altsheymer riskini artıran əsas faktor kimi tanınır.

Qiymət Mahir