Şəkərin bağırsaqlara zərəri açıqlandı

Şəkərli qənnadı məmulatlarının həddindən artıq istehlakı diş problemlərinə, bağırsaq iltihabına və şəkərli diabetə səbəb ola bilər.

TodayPress xəbər verir ki, bu barədə dietoloqlar xəbərdarlıq ediblər.  

Onların sözlərinə görə, bəzi insanlar şirniyyatı uşaqlıqdan vərdiş olaraq, stress zamanı və ya əhval-ruhiyyəni yaxşılaşdırmaq üçün istifadə edirlər. 

Şəkərin həddindən artıq istehlakı kariyesin yaranmasına səbəb ola bilər. Çünki ağız boşluğundakı mikroorqanizmlər şəkəri parçalayan zaman diş minasını məhv edən turşular buraxırlar. 

Bəzi bakteriya növləri də yüksək şəkər qəbulunda inkişaf edir və bağırsaqlarda iltihaba səbəb ola bilər.

Qənnadı məmulatları həm də çəki artımına səbəb olur ki, bu da ürək-damar xəstəliklərinin yaranma ehtimalını artırır. Onlar həmçinin qanda qlükoza səviyyəsini artırır, bu da mədəaltı vəzinin normal qan şəkəri səviyyəsini saxlamaq üçün daha çox insulin istehsal etməsinə səbəb olur. 

Dietoloqlar qeyd ediblər ki, şəkər qəbulunu tədricən azaltmaq üçün şirniyyatları meyvə və giləmeyvə ilə, şirin içkiləri isə su, bitki çayı və ya şəkərsiz qazlı su ilə əvəz etməlisiniz.