“Don Karlo” hələ də “Kral Klubu”nda işləyəcək

“Real Madrid” futbol klubunun baş məşqçisi Karlo Ançelotti cari mövsümün sonunda İspaniya təmsilçisini tərk edə bilər.   

TodayPress xəbər verir ki, italiyalı mütəxəssis “Kral klubu”ndan ayrılmaq qərarını versə də, sonradan şayiələri təkzib edib: 

“Real”ı tərk etmək niyyətim yoxdur. Florentino Pereslə birlikdə 2029-cu ilədək qalmağa ümid edirəm. Dörd il sonra onunla birgə getmək yaxşı olardı. Klubla möhtəşəm vida da təşkil edərdik”.  “Don Karlo” hələ də “kral klubu”nda işləməyə davam etməkdə qərarlıdır.   

Klub prezidenti Florentino Peresin isə “Real”ın baş məşqçisi ilə bağlı planları tam başqadır. Futbol funksioneri klubun keçmiş oyunçusu Xabi Alonsonu baş məşqçi vəzifəsinə gətirməyi düşünür.

Alonso hazırda “Bayer04” klubunda çalışır. İspaniyalı Leverkuzen təmsilçisi ilə böyük uğurlar qazanıb.  Bəs Ançelotti “Real Madrid” üçün nə deməkdir?  Karlo Ançelotti İspaniya nəhəngi üçün tarixi və simvolik bir şəxsiyyət deməkdir. Papa Karlo “Real”la tarixi uğurlara imza atıb.   

Klub tarixinin ən titullu çalışdırıcısı “Real Madrid”ə iki dəfə rəhbərlik edib.   İlk dövr 2013-2015-ci illəri əhatə edir. Bu dövr klub tarixində böyük bir dönüş nöqtəsi olub. Ançelottinin ilk dövründə hücum futbolu ilə parlayan komandası Beyl, Benzema, Ronaldodan ibarət üçlü hücum xətti ilə müxtəlif rəqiblərə başağrısı olub.   

“Kral klubu”nun 2013/14 mövsümündə əsas uğuru UEFA Çempionlar Liqasında 10-cu Çempionluğu bayram etməsi olub. “Real” Ançelottinin rəhbərliyi altında 12 illik gözləntidən sonra UEFA Çempionlar Liqasını qazanıb. 2014-cü ilin finalında “Atletiko Madrid” üzərində 4:1 hesablı qələbə komanda üçün tarixi bir məqam olub.

Madridlilər bu mövsümdə “Barselona”ya qarşı Kral Kubokunun finalında (2:1) da dramatik qələbə qazanıblar. “Real” 2014-cü ildə UEFA Superkubokunun və Klublararası Dünya Çempionatının qalibi olmaqla da beynəlxalq səviyyədə gücünü sübut edib. 

 Amma ilk dövrün çətinlikləri də Papa Karlodan yan keçməyib. 2014/15 mövsümünün sonunda “Real” nə La Liga, nə də UEFA Çempionlar Liqasını qazana bilib. Məlum durum Ançelottinin ilk “Real” dövrünün sonunu gətirib. O, 2015-ci ilin yayında postundan ayrılıb.  İtaliyalı mütəxəssisin ikinci “Real” dönəmi 2021-ci ildən indiyə kimi olan mərhələni əhatə edir. Ançelottinin 2021-ci il qayıdışı həm komanda, həm də onun özü üçün böyük uğurlarla yadda qalıb. İkinci dövrdə “Real” taktiki düzülüşdə daha çox balans və müdafiə sabitliyi ilə seçilib. Papa Karlo Vinisius Junior, Federiko Valverde kimi gənc oyunçuları inkişaf etdirərək “kral klubu”na yeni enerji gətirib. Ançelotti 2021/22 mövsümündə “Real”la 14-cü UEFA Çempionlar Liqası titulunu qazanıb.

Komanda dramatik mübarizədə Avropa nəhənglərindən PSJ, “Çelsi” və “Mançester Siti”ni məğlub edərək, finalda “Liverpul”u baş mükafata həsrət qoyub. “Real” La Ligada da dominantlığı ilə diqqət çəkib.

“Kral klubu” titullar sırasına UEFA Superkuboku və İspaniya Superkubokunu da əlavə edib.   İkinci dövrün “Real”ı böyük oyunlarda problemlər və liqa sabitliyi məsələləri ilə də gündəmi zəbt edib. Amma Papa Karlo təcrübəsi və soyuqqanlı yanaşması ilə komandanı çətin anlarda dəstəkləməyi bacarıb.  Bu Ançelottinin futbol tarixinin ən bacarıqlı və çevik taktiki qurucularından biri olduğuna işarə edir. Karlo Ançelotti müxtəlif liqalarda və komandalarla fərqli oyun sistemləri tətbiq edərək uğur əldə edib.

O, oyun vəziyyətlərinə uyğun taktiki dəyişikliklər etməyi bacarır. “Real”da da bu bacarığı ilə komandanın müxtəlif rəqiblərə uyğunlaşmasını təmin edib. Onun komandası həm müdafiədə, həm də hücumda balanslı oyun tərzi ilə tanınır. Karlonun rəhbərliyi ilə “Real” hər zaman həm təcrübəli oyunçulardan, həm də gənc istedadlardan maksimum faydalanmağı bacarıb.  Bundan başqa Ançelotti mükəmməl lider və motivator kimi tanınır.

Oyunçuları ilə qurduğu yaxın və dostcasına münasibət, onların motivasiyasını artırır. Ançelotti, oyunçuların özlərini həm meydanda, həm də xaricdə rahat hiss etmələrini təmin edən bir liderdir. O, çətin vəziyyətlərdə soyuqqanlı qərarları ilə seçilir.

Onun sakit xarakteri komandadakı gərginliyi azaltmaq və meydanda balans yaratmaq üçün mühüm rol oynayır. Futbolçularla münasibətində onun insanlara yaxınlığı və təvazökarlığı “Real” ailəsinin əsas sütunlarından biridir. 

Bir sözlə, Karlo Ançelotti yalnız baş məşqçi deyil, O, “Real Madrid” klubunun tarixinə damğa vuran liderdir. Onun gedişi klub üçün böyük bir itki ola bilər, lakin o, arxasında dərin iz buraxmış bir əfsanə olaraq xatırlanacaq. Karlo Ançelotti “Kral klubu”nun tarixi uğurlarında mühüm rol oynayaraq “Los Blancos”un əfsanəvi məşqçilərindən biri kimi yadda qalacaq.