Muxtar Auezovun romanının latın qrafikasında olan nəşri təqdim olundu

23 aprel 2025-ci il tarixində Bakıda Atatürk Mərkəzində Qazaxıstan Respublikasının Azərbaycan Respublikasındakı Səfirliyinin iştirakı ilə Beynəlxalq Türk Akademiyasının təşəbbüsü əsasında çap olunan Muxtar Auezovun “Abay” romanının Azərbaycan dilində yeni nəşrinin təntənəli təqdimat mərasimi keçirilib.

TodayPress xəbər verir ki, yeni nəşr dahi qazax mütəfəkkiri və maarifçisi Abay Kunanbayevin 180 illiyinə həsr olunub. 

Təqdimat mərasimi Qazaxıstanın Azərbaycandakı Səfiri Alim Bayel, Azərbaycanda Atatürk Mərkəzinin Rəhbəri Nizami Cəfərov, Milli Məclisin deputatları, TÜRKPA-nın Baş Katibi Mehmet Süreyya Er, Türk Mədəniyyəti və İrsi Fondunun Aparat Rəhbəri Fəxri Hacıyev, həmçinin elmi və təhsil ictimaiyyətinin nümayəndələrdən, ədəbiyyat xadimlərdən ibarət geniş qonaq kütləsini bir araya gətirib. 

Tədbirdə salamlama nitqi ilə Beynəlxalq Türk Akademiyasının Prezidenti, akademik Şahin Mustafayev çıxış edib. O, vurğulayıb ki, bu nəşr təkcə əsərin ilkin bədii gücünü bərpa etmir, eyni zamanda Qazaxıstan ilə Azərbaycan arasında mədəni əlaqələrin möhkəmləndirilməsini simvolizə edir. 

Qazaxıstanın Azərbaycandakı Səfiri Alim Bayel öz çıxışında Qazaxıstan-Azərbaycan əməkdaşlığının hazırkı vəziyyəti haqqında söz açıb. O, mədəni-humanitar əməkdaşlığın ikitərəfli münasibətlərin ən vacib istiqamətlərindən biri və bu kontekstdə kitabın nəşri daha bir əlamətdar hadisə olduğunu qeyd edib. 

Roman ilk dəfə 1954-cü ildə Əyyub Abbasov tərəfindən Azərbaycan dilinə tərcümə olunub, bu zaman tərcümə rus dilindəki versiyadan əsas götürülüb. O vaxtdan bəri, yəni yeddi onillikdən artıq bir müddətdə bu kitab yenidən nəşr edilməyib, geniş Azərbaycan oxucu auditoriyası üçün əlçatmaz olaraq qalıb. 

Romanın yeni nəşrində kiril əlifbası müasir ədəbi dil normalarına uyğun olaraq Azərbaycan əlifbasının latın qrafikası ilə əvəz olunub ki, bu da əsəri gənc oxucular nəsli üçün daha əlçatan və anlaşılan edir.   “Romanın bu formatda nəşri təkcə ədəbi hadisə deyil. Bu, mədəni yaddaş aktı, ortaq mənəvi irsə hörmətin təzahürü və onun qorunmasına töhfədir. Akademiya türk xalqlarının mədəni və mənəvi irsinin öyrənilməsi və təşviqi sahəsində hərtərəfli fəaliyyətini davam etdirəcək" deyə Akademiyanın rəhbəri vurğuladı.