Yerdə ilk şirin suyun yaranma tarixi məlum oldu - Yeni tapıntı

Avstraliyanın Curtin Universiteti və BƏƏ-nin Xəlifə Universitetinin alimləri şirin suyun Yer kürəsində təqribən dörd milyard il əvvəl meydana gəldiyinə dair sübutlar tapıblar.

TodayPress xəbər verir ki, araşdırmanın nəticələri “Nature Geoscience” jurnalında dərc olunub .

Mütəxəssislər Qərbi Avstraliyanın Cek Hills bölgəsindəki qədim sirkon kristallarını təhlil edərək, dörd milyard il əvvələ aid yüngül oksigen izotop imzalarını aşkar ediblər. Bu da onu göstərir ki, Yer kürəsində ilk şirin suyun yaranması planetin yaranmasından cəmi bir neçə yüz milyon il sonraya təsadüf edir.

Alimlər qeyd edir ki, bu tapıntı dörd milyard il əvvəl Yerin tamamilə duzlu okeanla örtüldüyünə dair mövcud nəzəriyyəyə meydan oxuyur. Yerin bu qədər dərinliyində şirin suyun olması qurunun və hidroloji dövrün daha erkən yaranmasından xəbər verir.

Kəşf göstərir ki, quru kütlələri və şirin su planetin yaranmasından 600 milyon ildən az müddətdə həyatın yaranması və çiçəklənməsi üçün şərait hazırlayıb.

Günel