Uşaqlarda xoruldama ağır nəticələrə səbəb ola bilər

Hər yaşda olan uşaqlar üçün keyfiyyətli yuxu tam böyümə və inkişaf üçün vacibdir. Uşaqlarda yuxu pozğunluğunun ən çox görülən təzahürü xoruldamadır. 

TodayPress məlumat verir ki, xoruldama tənəffüs yollarının tıxandığı zaman yuxuda yumşaq damağın titrəməsi nəticəsində yaranan səs titrəyişləridir.

Uşaqlarda xoruldamanın ən çox görülən səbəbi adenoidlərin və ya badamcıqların hipertrofiyasıdır. Xoruldama burun boşluğunun və farenksin patologiyası (allergiya, burun çəpərinin deviasiyası, kəskin yoluxucu xəstəliklər və s.) səbəbindən də yarana bilər. Bu məsələlərlə otorinolarinqoloqlar məşğul olurlar. 

Xoruldamanın başqa səbəbləri diş sisteminin pozğunluqları, artıq çəki, üz-çənə nahiyəsinin anadangəlmə anomaliyalarıdır. 

Uşaqlarda uzun müddət xoruldamanın ciddi nəticələri ola bilər. Belə ki, xoruldama nəticəsində yaranan gecə hipoksiyasının vəziyyəti yorğunluğun artmasına, süstlüyünə və akademik performansın azalmasına, sidik ifrazının pozulmasına səbəb ola bilər. 

Xoruldama zamanı baş verən ən təhlükəli vəziyyət obstruktiv yuxu apne sindromudur (OSA). Bu vəziyyət yuxu zamanı tənəffüsün qısamüddətli (1-2 saniyədən 10 saniyəyə qədər və ya daha çox) fasilələri kimi özünü göstərir, bundan sonra məcburi (gücləndirilmiş) inhalyasiya baş verir.  

Buna görə də mütəxəssislər xoruldama və OSA səbəbini mümkün qədər tez müəyyən etməyin vacib olduğunu qeyd edirlər. 

Xoruldamanı özünüz müalicə etməyə çalışmamalısınız, çünki yalnız həkim bu mövzuda lazımi diaqnostikanı apara və effektiv terapiya təyin edə bilər. 

Xoruldamanın səbəbindən asılı olaraq, müalicə konservativ, cərrahi və ya bu üsulların kombinasiyası ilə həyata keçirilə bilər. 

Günəş Mərd