Sağlam həyat tərzi qan laxtalanmasından qoruyur

Bir çox insanlar ürək-damar xəstəliklərinin yalnız yaşlı insanlar arasında geniş yayıldığını düşünürlər, lakin bu doğru deyil. 

TodayPress xəbər verir ki, bu barədə “Amerika Ürək Assosiasiyası” (AHA) məlumat yayıb.  

Bildirilib ki, bu xəstəliklərin simptomları çox vaxt yetkinlik dövründə özünü göstərsə də, lakin onlar uşaqlıq dövründən inkişaf etməyə başlayır.

Gənclərin həyat tərzinin tıxanmış damarlara necə təsir etdiyini öyrənmək üçün alimlər 21-27 yaş arası 240 nəfərin məlumatlarını təhlil ediblər. Onlardan karotid arteriyaların ultrasəs müayinəsi aparılıb və həmçinin həyat tərzləri haqqında danışmaq istənilib.

Ürək-damar riski xəstələrin bədən çəkisi, xolesterin və qan şəkərinin səviyyəsi, qan təzyiqi, pəhriz, fiziki fəaliyyət, yuxu və siqaret haqqında məlumatlardan istifadə etməklə qiymətləndirilib.

Məlum olub  ki, yuxu rejimi normal olmayan, artıq çəkidən əziyyət çəkən və fiziki fəaliyyəti məhdud olan gənclərdə damarların ateroskleroz adlanan lövhə ilə tıxanması insult, böyrək xəstəliyi və infarkt riskini artırır.

Tədqiqatçılar gənclər arasında sağlam həyat tərzinin vacibliyi haqqında maarifləndirmə işinin artırılmasına çağırış ediblər.

Günəş Mərd