Misirdə “Qızıl şəhər” tamamilə üzə çıxarıldı

Misirdə arxeoloqlar “İtirilmiş Qızıl şəhər” adlandırılan qədim 3 000 illik qızılçıxarma mərkəzini tamamilə üzə çıxarıblar. Dörd il davam edən intensiv qazıntılar nəticəsində səhra altından yenidən canlandırılan bu şəhər Misirdə son yüz ildə Tutanxamonun məqbərəsinin kəşfindən sonra ən mühüm tapıntılardan biri hesab edilir.

TodayPress xəbər verir ki, bu barədə “Interesting Engineering” məlumat yayıb.

Qızılçıxarma şəhəri Aten adlanır və 2020-ci ildə Luksor Vadisi Kralları bölgəsində, Qırmızı dəniz əyalətində yerləşən Cəbəl-Sukari yaxınlığında aşkar edilib. Qazıntılar bu həftə başa çatdıqdan sonra ekspertlər şəhərin yaşayış evləri, emalatxanalar, inzibati binalar, məbədlər və hamamlar kimi strukturlarının mükəmməl qorunduğunu bildiriblər.

Alimlər həmçinin tam təchiz olunmuş qızılçıxarma avadanlıqları olan dağ qəsəbəsinin qalıqlarını aşkarlayıblar. Ərazidə daşları xırdalama və üyütmə stansiyaları, süzmə hovuzları və qızılı kvars damarlarından ayırmaq üçün istifadə edilən əridici sobalar tapılıb.

Misirin Turizm və Qədim Abidələr Nazirliyi bildirib ki, qazıntılar zamanı aşkarlanan arxitektura elementləri sənədləşdirilib və bərpa edilib. Daha sonra onlar müasir mədən işlərinin təsirindən qorumaq üçün ilkin məkanından 3 km şimalda daha təhlükəsiz əraziyə köçürülüb.

Aten şəhəri e.ə. 1391–1353-cü illərdə hökmranlıq etmiş 18-ci sülalənin doqquzuncu fironu III Amenhotep dövründə tikilib və Şimali Afrikada indiyə qədər aşkar edilmiş ən böyük qədim şəhər hesab edilir.

Qazıntılar zamanı şəhərin Roma dövrü (e.ə. 30 – eramızın 639-cu illəri) və İslam dövrü (642–1517-ci illər) kimi sonrakı tarixi mərhələlərə aid artefaktlar da aşkar edilib.

Nazirlikdən verilən məlumata görə, tapıntılar arasında 628 gil qırığı üzərində yazılmış heroqlifik, demotik və yunan mətnləri, eləcə də Ptolemeylər dövrünə aid tunc sikkələr var.

Qiymət Mahir