İlk rəssamlar Neandertallar olub? - Faktlar açıqlandı

Sauthempton Universitetinin alimlərinin apardığı tədqiqatlar və onların nəticələri sənətin mənşəyi ilə bağlı ənənəvi fikirləri şübhə altına alıb. 

TodayPress xarici mediaya istinadən xəbər verir ki, tapıntılar ilk rəssamların müasir insanlardan daha çox, neandertalların ola biləcəyini göstərib. 

Onlar aşkar ediblər ki, İspaniyanın Maltravieso mağarasındakı əl trafaretlərinin minimum yaşı 66,700 ildir. Bu vizual sənətin ən qədim formalarından biridir. 

Tədqiqatçılar qabaqcıl “U” seriyalı metoddan istifadə edərək mağaranın müxtəlif otaqlarında yerləşən 60-dan çox trafareti təhlil ediblər. Bu üsul piqmentləri örtən kalsium karbonat qabıqlarının minimum yaşını aydınlaşdırmağa imkan verib ki, bu da onların mənşəyinin Orta Paleolitə söykəndiyini göstərir. 

“U” seriyalı metod kalsit qabıqlarında uran və toriumun izotop nisbətinin ölçülməsinə əsaslanır. Uran torpaqdan səth suları ilə yuyulur, daha sonra buxarlandıqda kalsium karbonat əmələ gətirir. Proses uranın toriuma təcrid olunmuş çevrilməsini nəzərdə tutur ki, bu da birləşmələrin yaşını yüksək dəqiqliklə müəyyən etməyə imkan verir. 

Tədqiqatçılar sənət əsərinin bütövlüyünü qorumaq üçün minimal karbonat nümunələri götürüblər.  

Alimlər vurğulayıblar ki, karbonat qabığının əmələ gəlməsi yerli şəraitdən, məsələn, rütubətdən asılıdır ki, bu da yataqların müxtəlif yaşlarını izah edə bilər. Lakin təhlillərin nəticələri göstərir ki, Avropada əl ilə trafaretlərin hazırlanması ənənəsi dünyanın digər regionlarına nisbətən xeyli əvvəl başlayıb. Müqayisə üçün qeyd edək ki, İndoneziyanın Sulavesi adasındakı əl trafaretlərinin minimum yaşı 39,900 ildir.

Günəş Mərd