Alimlər piylənmə və əzələ artımına təsir edən genin kodunu açdılar

Çinli alimlər “FTO” geninin kodunu açaraq onun həm piylənmə, həm də əzələ inkişafına təsir edən ikili rolunu müəyyən ediblər. Bu kəşf gələcəkdə piylənmə və diabetin müalicəsi üçün yeni yanaşmalar təklif edə bilər, xüsusilə də hazırda istifadə edilən “GLP-1” reseptor agonistlərinə alternativ ola bilər, çünki bu dərmanlar bəzi hallarda əzələ kütləsinin arzuolunmaz azalmasına səbəb olur. 

TodayPress xəbər verir ki, “Nature Communications”da dərc olunan tədqiqat Pekinin Kök Hüceyrə və Rejenerasiya İnstitutu (BISCRM) və Zoologiya İnstitutunun (IOZ) alimləri tərəfindən aparılıb. 

Araşdırma “FTO rs9939609-A” adlı gen variantına fokuslanıb. Bu gen avropalıların 45%-ində, afrikalıların 24%-ində, şərqi asiyalıların 30%-ində və cənubi asiyalıların 35%-ində mövcuddur və piylənmə riski ilə əlaqələndirilir.  Alimlər aşkar ediblər ki, bu gen variantı “H19” və “IGF2” genlərini aktivləşdirərək hüceyrələrdə zəncirvari reaksiya yaradır. Əvvəlcə bu proses əzələlərin böyüməsini stimullaşdırır, lakin nəticədə kök hüceyrələrin tükənməsinə və erkən yaşlanmaya səbəb olur. 

Maraqlı məqam odur ki, bu gen variantına sahib olan kök hüceyrələr skelet əzələlərinə sürətlə çevrilir, lakin piylənmə səbəbindən yüksək yağ səviyyələrinə məruz qaldıqda insulinə qarşı müqavimət göstərirlər.  Bu tapıntı skelet əzələlərinin piylənmə və yaşlanma prosesində əsas faktor ola biləcəyini göstərir. 

Alimlər hesab edirlər ki, bu genin fəaliyyətini düzgün tənzimləməklə piylənmə ilə mübarizə aparmaq, eyni zamanda əzələ kütləsinin artımını təmin etmək mümkün ola bilər.  Piylənməyə qarşı effektiv müalicə metodları axtarışında bu kəşf böyük rol oynaya bilər və gələcəkdə “FTO” genini hədəf alan yeni terapevtik strategiyalar inkişaf etdirilə bilər. 

Qiymət Mahir