Azərbaycanda bərpaolunan enerji: İmkanlar və perspektivlər…

İqtisadiyyat

03.04.2025 10:05

“Azərbaycanın bərpa olunan enerji sektorunun inkişafı iqtisadiyyat üçün böyük əhəmiyyət kəsb edir”.

İqtisadçı Günay Hüseynova bu barədə TodayPress-ə danışarkən bildirib.

O, əlavə edib ki, bu sahədə daha çox insan əməyinə ehtiyac var ki, bu da işsizlik problemini azaldacaq.

"Ölkəmiz enerji resursları ilə zəngin olub, dünya bazarında enerji resurslarının ixracatçısı kimi tanınır. Bərpa olunan enerji mənbələrindən istifadə isə Azərbaycanın prioritet məsələlərindən biridir. 2021-ci il 31 may tarixində təsdiq olunan “Elektrik enerjisi istehsalında bərpa olunan enerji mənbələrindən istifadə haqqında” Azərbaycan Respublikasının 339-VIQ nömrəli Qanunu və 2020-ci il 22 sentyabr tarixində Prezident İlham Əliyevin imzaladığı 1159 nömrəli Fərman ölkəmizin bu sahədəki irəliləyişinə təkan verib. Belə ki, həmin Fərmanla Azərbaycan Respublikası Energetika Nazirliyi yanında Bərpa Olunan Enerji Mənbələri Dövlət Agentliyi yaradılıb və Agentliyin əsasnaməsi təsdiq edilib".

İqtisadçı, bərpa olunan enerji mənbələrinin istifadəsinin iqtisadi baxımdan olduqca əlverişli olduğunu vurğulayıb. O, bu sahənin inkişafının xarici valyutanın ölkəyə axını baxımından faydalı olduğunu, həmçinin qənaət edilən təbii qazın xarici ölkələrə ixracı potensialı baxımından fürsətlər yaratdığını bildirib.

Günay Hüseynova sonda qeyd edib ki, xarici investorlar, xüsusilə də Ərəb ölkələri Azərbaycanda bərpa olunan enerji sektoruna investisiya qoymaqda maraqlıdırlar.

Qeyd edək ki, Almaniya prezidenti Frank-Valter Ştaynmayer və xanımı Elke Budenbender aprelin 2-də isə Azərbaycana rəsmi səfər ediblər. Azərbaycan Prezidenti İlham Əliyev Almaniya Prezidenti ilə mətbuata bəyanatında bildirib ki, bərpaolunan enerji sahəsində, harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var.

“Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 qiqavata çatdırmaq fikrindəyik və bu, tam realdır. Bunun bir hissəsi Avropaya ixrac ediləcək” deyə dövlətimizin başçısı vurğulayıb.

Türkan İsgəndərli