Alkoqollu içkilər və siqaretlərlə bağlı yeni qayda

Oktyabrın 1-dən Azərbaycanda alkoqollu içkilərin və tütün məmulatlarının tranzit daşınması zamanı yarana biləcək gömrük borcunun ödənilməsinin təmin edilməsi məqsədilə Gömrük Məcəlləsinin 258.1.4 –cü maddəsinə əsasən təminat üsulu olaraq depozitin tətbiqinə başlanacaq.

TodayPress bu barədə Dövlət Gömrük Komitəsinə istinadən xəbər verir.

Məlumata görə, təminatın məbləği tranzit daşınmasını həyata keçirən hər nəqliyyat vasitəsinə münasibətdə minimum 200 000 ABŞ dolları ekvivalentində müəyyən edilib.

Gömrük bəyannaməsi təsdiq edildiyi gün vəsaitin Azərbaycan Mərkəzi Bankının müəyyən etdiyi məzənnəyə uyğun olaraq manat ifadəsində banka depozit şəklində qoyulmasına dair təsdiqedici sənəd gömrük orqanına təqdim olunmalıdır.