“TikTok” üçün potensial alıcı açıqlandı

Texnologiya nəhəngi “Amazon” gözlənilmədən “TikTok”un alınması ilə bağlı təklif irəli sürüb.   

TodayPress xəbər verir ki, bu barədə “The New York Times” məlumat yayıb.   

Məlumata görə, bu addım ABŞ-də tətbiqə qarşı qadağa qüvvəyə minmədən bir neçə gün əvvəl atılıb. 

Danışıqlarla tanış mənbələr bildirirlər ki, “Amazon”un müraciəti hələlik ciddi qarşılanmayıb.

Bununla yanaşı, bir sıra digər potensial alıcılar da aktivləşib və “TikTok”un alınmasına hazır olduqlarını ABŞ hökumətinə sübut etməyə çalışırlar. 

Xatırladaq ki, yanvarın 19-da ABŞ-də “Amerikalıların xarici düşmənlər tərəfindən idarə olunan tətbiqlərdən qorunması haqqında” qanun qüvvəyə minib.

Qanun “TikTok”un Çin şirkəti “ByteDance”in nəzarətində fəaliyyətini qadağan edir. 

ABŞ prezidenti Donald Tramp bu qanunun icrasını 75 gün müddətinə təxirə salaraq Ədliyyə Nazirliyinə tətbiqin bloklanmamasını tapşırmışdı. Bu müddət aprelin 5-də başa çatacaq.

Həmin tarixədək “TikTok”un ABŞ-dəki bölməsinin satışı ilə bağlı razılaşma əldə olunmasa, tətbiq ölkədə bloklanacaq.  Qiymət Mahir