Üç güləşçimiz Avropa çempionatının yarımfinalına yüksəldi

Slovakiyada güləş üzrə Avropa çempionatı keçirilir.   

TodayPress xəbər verir ki, Bratislava turnirinin ilk günündə sərbəst güləşçilər xalça üzərinə çıxıblar. 

Azərbaycan yığma komandasının 5 güləşçisindən 3-ü yarımfinala yüksəlib. 

İslam Bazarqanov (57 kq) 1/4 finalda türkiyəli Muhammet Karavuşa 8:1 hesabıyla qalib gələrək yarımfinala vəsiqə qazanıb.

İslam finala aparan yolda Naçın Monquş (UWW) ilə qarşılaşacaq. 

Əli Rəhimzadə (65 kq) 1/8 finalda belçikalı Ayub Musayevə qalib gəlib 7:2. Növbəti görüşdə almaniyalı Niko Meqerleyə tam üstünlüklə (10:0) qalib gələn Əli yarımfinala adlayıb. Onun növbəti rəqibi fransalı Xamzat Arsamerzoyev olacaq. 

Kənan Heybətov (70 kq) təsnifat mərhələsində avstriyalı Benedikt Huberə tam üstünlüklə (10:0) qalib gələrək 1/4 finala adlayıb.

O, yarımfinala vəsiqə uğrunda isə bolqarıstanlı Mihail Georgiyevə 4:1 hesabıyla qalib gəlib. Heybətov finala aparan yolda David Bayevlə (UWW) görüşəcək. 

Orxan Abasov (79 kq) təsnifat mərhələsində fransalı Zelimxan Xadjiyevə 5:9 hesabıyla məğlub olub.  Abubakr Abakarov (97 kq) isə təsnifat mərhələsində ukraynalı Vasil Sovaya “tuş”la (9:5) qalib gələrək 1/4 finala yüksəlib. O, bu mərhələdə macarıstanlı Riçard Veqə 2:5 hesabı ilə uduzub.   

Namiq HUN