Türkiyə millisi qrup lideri oldu

UEFA Millətlər Liqasında III tur davam edir. İkinci oyun günündə 4 qrupda 8 matç keçirilib.   

TodayPress xəbər verir ki, Türkiyə millisi Monteneqro yığmasına minimal fərqlə qalib gəlib 1:0.   

B Liqasının IV qrupunda baş tutan qarşılaşmada “ay-ulduzlular”ın yeganə qolunu 69-cu dəqiqədə İrfancan Kahveci vurub.   

Üç oyundan sonra Vinçentso Montellanın yetirmələri 7 xalla qrup lideridir.   

A liqasında qrup liderləri Almaniya və Niderland səfər görüşlərinə çıxıblar.  Almanlar Bosniya və Herseqovinaya qalib gəliblər 2:1.

Deniz Undavın dubl etdiyi matçda, Edin Ceko meydan sahiblərinin təsəlli qolunu vurub.   

Bundestimdən fərqli olaraq "narıncılar" Macarıstan səfərindən 1 xalla dönüblər.

Matçın 32-ci dəqiqəsində Roland Şallai Macarıstan millisini hesabda irəli çıxarıb.

Niderland yığması Denzel Dümfrisin 83-cü dəqiqə qolu ilə məğlubiyyətdən qaça bilib 1:1.     

Azərbaycan millisinin yer aldığı C Liqasının I qrupunda Slovakiya İsveçlə heç-heçə oynayıb 2:2.   

III turun digər oyunlarında Çexiya Albaniyanı (2:0), Ukrayna Gürcüstanı (1:0) üstələyib.

İslandiya və Uels isə qalibi müəyyən etməyiblər (2:2).   

Namiq HUN