Tennis turnirində tarixi dəyişikliklər ediləcək

“Uimbldon” matçlarını rəqəmsal “xətt hakimləri” idarə edəcək. 

TodayPress “The Times”a istinadən xəbər verir ki, turnirin 147 illik tarixi ərzində ilk dəfə olaraq, təşkilatçılar yüksək texnologiyalı süni intellekt sisteminin xeyrinə xətt hakimlərinin xidmətindən imtina etmək qərarına gəliblər.

Turnirin mərkəz kortu da daxil olmaqla, 18 kortun hamısında avtomatlaşdırılmış Elektron Xətt Zəngi (ELC) sistemi olacaq.

Baxmayaraq ki, əvvəlcə “Uimbldon” turnirinin təşkilatçıları ELC-nin tətbiqi ideyasına şübhə ilə yanaşıblar. 

Qeyd edək ki, daha əvvəl iki həftə davam edən turnirdə 650-dən çox matçı idarə etmək üçün yaşı 18-dən 80-ə qədər olan təxminən 300 xətt hakimi işə götürülürdü. 

İndi onları qərəzsiz və yüksək dəqiqlikli süni intellekt sistemi əvəz edəcək ki, bu da, təşkilatçıların fikrincə, hakimliyin keyfiyyətini yüksəldəcək və tennisin müasir tendensiyalarına uyğun olacaq.

Namiq HUN