“Sambaçılar” Amerika Kuboku ilə vidalaşdı

Futbol üzrə Amerika Kubokunda bütün yarımfinalçılar bəlli olub.

TodayPress xəbər verir ki, bu mərhələnin cütləri 1/4 finalın son iki oyunundan sonra müəyyənləşib.

Kolumbiya yığması Panamanı 5 cavabsız qolla məğlub edərək güclü kvartetə adını yazdırıb. Qlendeyl qarşılaşmasında Con Kordoba, Xames Rodriges, Luis Dias, Riçard Rios və Migel Borxa fərqlənib. 

Uruqvay - Braziliya matçında isə əsas vaxtda hesab açılmayıb 0:0. Penaltilər seriyasında rəqibinə uduzan (2:4) "sambaçılar" turnirlə vidalaşıb.

Yarımfinal mərhələsində Argentina Kanada ilə, Uruqvay isə Kolumbiya ilə qarşılaşacaq. 

Bu mərhələnin oyunları iyul ayının 10-da və 11-də keçiriləcək. 

Namiq HUN