Milli komanda Heraklionda 4-cü oldu

Qılıncoynatma üzrə yığma komandamız Yunanıstanda keçirilən Dünya Kubokunda uğurla çıxış edib.   

TodayPress xəbər verir ki, sablya növü üzrə qadınlardan ibarət milli komandamız Heraklion turnirində 4-cü olub. 

Mübarizəyə 1/16 finaldan başlayan millimiz ilk görüşündə Sinqapur yığmasına 45:32 hesabı ilə qalib gəlib. Daha sonra heyəti Anna Başta, Zərifə Hüseynova, Palina Kaspiaroviç və Səbinə Kərimovadan ibarət olan kollektiv Macarıstan seçmə kollektivini 45:43 hesab ilə məğlub edərək adını ən güclü 8 komanda sırasına yazdırıb.   

Komandamız qələbə seriyasının davamını ABŞ yığmasını 45:38 hesabı ilə məğlub etməklə gətirib.   Yarımfinalda fransalı rəqiblərinə 30:45 hesab ilə uduzan sablyaçılarımız 3-cü yer uğrunda keçirilən qarşılaşmada Koreya Respublikasına 33:45 hesabı ilə məğlub olub.  Qeyd edək ki, daha əvvəl baş tutan qadın sablyaçıların fərdi yarışında ən yaxşı göstərici Anna Baştaya məxsusdur. Qılıncoynadanımız turnirdə 12-ci nəticə göetərib. Səbinə Kərimova 45, Palina Kaspiaroviç 60, Zərifə Hüseynova isə 146-cı yeri tutub.   Dünya Kubokunda 200-dən çox qadın sablyaçı yarışıb.   

Namiq HUN