Maria Stadnik Olimpiadadakı rəqiblərini tanıdı

Qadın güləşçilərdən ibabrət yığma komandanın lideri Mariya Stadnik Azərbaycanı Paris-2024 Yay Olimpiya Oyunlarında təmsil edəcək. 

TodayPress xəbər verir ki, multi-idman oyunlarında 96 pəhləvan 6 çəkidə yarışacaq. Stadnik 50 kq-da qələbə uğrunda mübarizə aparacaq. 

4 qat Olimpiya mükafatçısının rəqiblərinin siyahısı açıqlanıb. Yığmamızın lideri karyerasının 5-ci Olimpiadasına avqustun 6-da qatılacaq. Onun çəkisində 15 güləşçi yer alıb. Bu rəqiblər arasında Mariyaya çoxlu tanış simalar var. 

O, bu il Türkiyə güləşçisi Evin Demirhana qalib gələrək 10-cu dəfə Avropa çempionu titulunu qazanıb. Güləşçimiz 9-cu qitə qızılına isə ukraynalı Oksana Livaçı məğlub etməklə sahib çıxıb. 

Qeyd edək ki, Mariya Stadnik 2008-ci ildən qatıldığı Avropa çempionatlarını qalibiyyətlə başa vurub. Güləşçimizin hesabında həm Avropa, həm də İslam Oyunlarında 2 qələbə var. Stadnik 2 dəfə Dünya çempionluğunun sevincini yaşayıb. Ümumilikdə isə mundiallardan qazancı 6 medaldır. Stadnik Azərbaycan idman tarixinin ən çox Olimpiada medalı qazanan idmançısı kimi bir rekorda imza atıb. 

Namiq HUN