Kriştiano Ronaldo daha iki rekorda imza atdı

Portuqaliya millisinin kapitanı Avropa çempionatında ardıcıl oyunların sayına və ötürmələrin sayına görə rekord müəyyənləşdirib.

TodayPress xəbər verir ki, Kriştiano Ronaldo Avro-2024-ün qrup mərhələsinin 2-ci turu, Türkiyəyə qarşı oyunda Portuqaliya yığmasının start heyətində yer alıb. Bu matç onun qitə çempionatlarında ardıcıl 19-cu oyunu olub. 39 yaşlı futbolçu italiyalı Leonardo Bonuççinin 18 matçlıq rekordunu geridə qoyub. Ronaldo həm də Avropa çempionatındakı oyunların ümumi sayına görə rekorda sahibdir. Türkiyə ilə oyun onun Avroda 27-ci oyunu olub. 

Kriştiano həm də Avropa Çempionatları tarixində ən çox qol vurub. Onun aktivində 14 qol var. Əfsanəvi portuqaliyalı futbolçu Avro 2024-də hələ qol vura bilməsə də, 3-cü qolda Bruno Fernandeşə məhsuldar ötürmə edib. Qitə çempionatlarında 7 qol ötürməsi edən forvard bu göstəricidə də ən yaxşıdır.

Xatırladaq ki, daha əvvəl Kriştiano Ronaldo Avropa çempionatında iştirak sayına görə rekorda imza atıb. Bu turnir onun karyerasında altıncıdır.

Namiq HUN