İngiltərədən möhtəşəm geridönüş: "Şir"lər finalda

Futbol üzrə Avropa çempionatında ikinci finalçının adı müəyyənləşib.

TodayPress xəbər verir ki, Dortmundun "Siqnal İduna Park" stadionunda, Niderland və İngiltərə milliləri finala vəsiqə uğrunda yarışıblar.

Almaniyalı FIFA referisi Feliks Svayerin fit sahibi olduğu matçın birinci hissəsində komandalar hərəyə bir qolla kifayətləniblər. 7-ci dəqiqədə “zanbaqlar”ın heyətində Xavi Simons möhtəşəm zərbə ilə ingilislərin torunu silkələyib 1:0. “Şirlər”in cavabı özünü çox gözlətməyib. Harri Keyn ona qarşı kobud oyuna görə rəqibi penalti zərbəsi ilə cəzalandırıb 1:1. Fasiləyə qədər ingilisləri qapı çatı, Niderland millisini isə dirək növbəti qoldan qurtarıb. Başabaş mübarizədə keçən ikinci hissədə də azarkeşlər qol seyr ediblər. 90+1-ci dəqiqədə Ollie Uotkins qələbə qolunu vuraraq İngiltərə millisini finala çıxarıb 2:1. 

İngiltərə ardıcıl ikinci dəfə Avropa çempionatının həlledici matçında oynayacaq. Futbolun yaradıcıları qızıl medallar uğrunda matçda İspaniya millisi ilə qarşılaşacaq.

Qeyd edək ki, çempionatın həlledici matçı iyulun 14-də keçiriləcək.

Namiq HUN