İngiltərə adını kvartetə yazdırdı

Futbol üzrə Avropa çempionatında 1/4 finalın son oyunları keçirilir.

TodayPress xəbər verir ki, günün ilk matçı Düsseldorfdakı "Esprit Arena"da İngiltərə və İsveçrə komandaları arasında baş tutub. Bu oyuna qədər 15 qarşılaşmanın 11-ni qazanan futbolun yaradıcıları cütün favoriti sayılsalar da, topu ilk olaraq qapılarından çıxartmalı olublar.

Matçın 75-ci dəqiqəsində Brel Embolo İsveçrəni hesabda irəli çıxarıb 1:0. Amma İngiltərə millisinin cavabı özünü çox gözlətməyib. 80-ci dəqiqədə Bukayo Saka oyunda status-kvonu bərpa edib 1:1. 

İtaliyalı referi Daniele Orsatonun fit sahibi olduğu matçın əsas vaxtında qalib məlum olmayıb. Overtaymda da tərəflər fərqlənməyincə, cütün qalibi penaltilər seriyasında müəyyənləşib. Futbol lotoreyasını İngiltərə millisi qazanaraq turnirin yarımfinal mərhələsinə yüksəlib.  

Namiq HUN