Futbol hakimi Tofiq Bəhramovun anadan olmasından 100 il ötür

Azərbaycanın əfsanəvi futbol hakimi Tofiq Bəhramovun anadan olmasından 100 il ötür.

TodayPress xəbər verir ki, “Qızıl fit” və “Qızıl ilahə” mükafatlarının sahibi, dünyada adına stadion olan ilk hakim Tofiq Bəhramov prinsipiallığı və obyektivliyi ilə hər zaman gənc həmkarlarına örnək olmağı bacarıb.

Xatırladaq ki, Tofiq Bəhramov 1925-ci il yanvarın 29-da Ağdamda anadan olub. O, 1966-cı ildə keçirilmiş dünya çempionatında Almaniya və İngiltərə milli komandaları arasında final oyununda Cefri Hertsin qolunu qeydə almaqla məşhurlaşıb. Daim prinsipiallığı, obyektivliyi ilə seçilən hakim oyundan sonra kraliça II Yelizavetanın şəxsən təqdim etdiyi “Qızıl fit” mükafatına layiq görülüb.

Tofiq Bəhramov 1993-cü il martın 26-da dünyasını dəyişib.

Namiq HUN