Emreli "Nürnberq"i məğlubiyyətdən qurtardı

Futbol üzrə Azərbaycan yığma komandasının forvardı Mahir Emreli Almaniya 2-ci Bundesliqasında növbəti oyununa çıxıb.

TodayPress xəbər verir ki, onun şərəfini qoruduğu “Nürnberq” klubu XI turda səfərdə “Hamburq”un qonağı olub.

“Volkspark” qarşılaşmasında tərəflər hərəyə 1 qol vurublar. 

Ilk 15 dəqiqədən sonra hesabda geri düşən “Nürnberq”i Emreli məğlubiyyətdən qurtarıb. Mahir 63-cü dəqiqədə dəqiq zərbə ilə topu Fernandesin qoruduğu qapıdan keçirib.

Qeyd edək ki, Mahir Emreli “Nürnberq”də vurduğu qol sayını artıq 4-ə çatdırıb. Forvard ardıcıl 4 oyundur ki, rəqib torlarını silkələyir.

"Nürnberq" XI turdan sonra 17 xalla 6-cı pillədə qərarlaşıb.

Namiq HUN