ECA-nın xətti ilə Avarçəkmə üzrə “Prezident Kuboku” reqatası keçiriləcək

Ümummilli Lider Heydər Əliyevin 102-ci ildönümünə həsr olunan “Prezident Kuboku 2025” beynəlxalq reqatasında iştirakçı ölkələrin adları açıqlanıb.   

TodayPress xəbər verir ki, aprel 28-dən mayın 2-dək keçiriləcək yarışda Avropa, Asiya və Afrikadan 20 ölkədən 200-dən çox idmançı gücünü yoxlayacaq. 

Aprelin 28-də “Prezident Kuboku 2025” beynəlxalq reqatası çərçivəsində Füzulidə yerləşən Köndələnçay su anbarında avarçəkənlərin nümunəvi çıxışları olacaq.   

Reqatanın rəsmi paradı və komandaların təqdimatı aprelin 29-da Mingəçevir şəhərində keçiriləcək.   

Ertəsi gün Suqovuşanda “Prezident Kuboku-2025” beynəlxalq reqatasının rəsmi açılış mərasimi və 200 metr məsafədə yarışlar baş tutacaq. 

Reqata mayın 1-2-də Mingəçevir “Kür” Olimpiya Tədris-İdman Mərkəzində davam edəcək. Komandalar kayak, kanoe və akademik növlərdə mübarizə aparacaqlar. 

Mayın 2-də Mingəçevirdə “Kür” Olimpiya Tədris-İdman Mərkəzinin qarşısında “Prezident Kuboku-2025” beynəlxalq reqatasının bağlanış mərasimi keçiriləcək.   

Qeyd edək ki, “Prezident Kuboku” reqatası ardıcıl üçüncü ildir Avropa Kanoe Assosiasiyasının (ECA) rəsmi təqvim planına daxil edilib.   

Namiq HUN