Azərbaycanın yunan-Roma güləşçisi Avropa çempionatında finala yüksəldi

Azərbaycanın yunan-Roma güləşçisi Ziya Babaşov (63 kq) Albaniyanın paytaxtı Tiranada keçirilən U-23 Avropa çempionatında finala yüksəlib.

TodayPress xəbər verir ki, təmsilçimiz startda isveçli Aleksander Vafaini mübarizədən kənarlaşdırıb – 3:1. Həmyerlimiz 1/4 finalda yunanıstanlı Marios Kapantaisə (10:2), yarımfinalda isə bolqarıstanlı Miroslav Emilova (8:0) tam üstünlüklə qalib gələrək adını finala yazdırıb. Ziya həlledici görüşdə moldovalı Vitali Yeriomenkoyla qarşılaşacaq.

Elmir Əliyev (55 kq) moldovalı Maksim Sarmanovla (9:1) albaniyalı Andi Mukanı (11:2) vaxtından əvvəl üstələyərək yarımfinala yüksəlib. Finalın bir addımlığında rusiyalı Alibek Amirovla gərgin mübarizə şəraitində keçən görüşün sonlarında təşəbbüsü əldən verən Elmir sonuncu xal prinsipinə əsasən (2:2) məğlubiyyətlə barışıb. Əliyev  bürünc medal uğrunda Filip Bartoşik (Çexiya) – Vasileios Papageorgiu (Yunanıstan) qarşılaşmasının qalibiylə güləşəcək.

Xasay Həsənli (77 kq) yunanıstanlı Andreas Vasilakopula tam üstünlüklə (9:0) qalib gəlsə də, 1/4 finalda almaniyalı Aaron Bellşeidtə 3:7 hesabıyla məğub olub. Rəqib finala yüksəldiyi üçün Xasay sabah təsəlliverici görüşdə bolqarıstanlı Albert Doyevlə güləşəcək.