Azərbaycan basketbol millisi Avropa çempionatında finala yüksəldi

Azərbaycan basketbol millisi Albaniyanın Elbasan şəhərində 18 yaşa qədər oğlanlar arasında Avropa çempionatının "C" divizionunda yarımfinal oyununa çıxıb.

TodayPress xəbər verir ki, yığma ev sahibi Albaniya seçməsi ilə qarşılaşıb və rəqibi üzərində 62-41 hesablı qələbə qazanıb. 18 xal toplamış milli komandanın üzvü Derin Berköz qarşılaşmanın ən məhsuldar basketbolçusu seçilib. Bu qələbə ilə Azərbaycan yığması Avropa çempionatının finalına vəsiqə qazanıb. Millinin iyulun 28-də baş tutacaq final görüşündəki rəqibi Lüksemburq-Ermənistan matçının qalibi olacaq.