AFFA-dan sərt cəzalar

AFFA-nın İntizam Komitəsinin iclası keçirilib.   

TodayPress xəbər verir ki, iclasda Premyer Liqanın XXVI turunda baş verənlərə müvafiq qərarlar verilib. 

“Araz-Naxçıvan” – “Qarabağ” görüşündə yaşananlara görə üç futbolçu diskvalifikasiya olunub.

Təcavüzkar davranışa görə, “Araz-Naxçıvan”ın birbaşa qırmızı vərəqə alan futbolçusu Felipe Santos 2-si şərti olmaqla 4 oyun cəzalanıb.

Klub 3000 manat cərimə edilib. Sınaq müddəti 3 ay təyin edilib. 

“Qarabağ”ın futbolçuları Elvin Cəfərquliyev və Musa Qurbanlı təcavüzkar davranışa cəhd etdiklərinə görə hərəsi 1-i şərti olmaqla 2 oyun cəzalanıb. Ağdam klubu hər futbolçu üçün 2000 manat cərimələnib.

Sınaq müddəti 3 ay təyin edilib. 

Matç bitdikdən sonra meydana kənar şəxslər daxil olduğuna görə “Araz-Naxçıvan” 800 manat cərimələnib. 

“Səbail”in futbolçusu Suleyman Alluş “Zirə” ilə səfər görüşündə təcavüzkar davranışa görə birbaşa qırmızı vərəqə aldıqdan sonra hakimləri təhqir edib. O, 4 oyun cəzalanıb, klubunu isə 3000 manat ziyana salıb.  “Sumqayıt”la matçda 4 futbolçusu sarı vərəqə alan “Kəpəz” 700 manat cərimələnib. 

“Turan Tovuz”un futbolçusu Emmanuel Hakman “Neftçi” ilə səfər matçında rəqibi aşkar qol imkanından məhrum etdiyinə görə birbaşa qırmızı vərəqə alıb.

O, 1 oyunluq cəzalanıb, klub isə 1000 manat cərimə edilib.   

Namiq HUN