“Təhsilin keyfiyyəti 700 balla ölçülməməlidir” – Ekspert

“Hələ də qəbul etmək istəmirik ki, təhsilin keyfiyyəti 700 ballıq şkala ilə ölçülə bilməz”.

Təhsil eksperti Nadir İsrafilov bunu TodayPress-ə açıqlamasında deyib. 

Onun sözlərinə görə, qəbul imtahanında abituriyentin topladığı bal etalon deyil, nisbi göstəricidir: 

“Kütləvi pedaqoji ədəbiyyatda təhsilin keyfiyyəti cəmiyyətdə təhsil prosesinin vəziyyətini və səmərəliliyini göstərən sosial kateqoriya kimi xarakterizə olunur. UNESCO-nun tərifinə əsasən təhsil şəxsiyyətin bacarıq və davranışlarının təkmilləşdirilməsinin elə bir prosesidir ki, bu zaman o, əqli yetkinlik və fərdi inkişafa nail olur. Biz isə hələ də təhsilin keyfiyyətini neçə nəfərin ali məktəbə qəbul olunması, neçə nəfərin 500-700 civarında bal toplaması ilə ölçürük”.

Ekspertin sözlərinə görə, test üsulunun tətbiqindən illər keçsə də, məsələyə yanaşma tərzimiz dəyişməz olaraq qalır. Hələ də qəbul edə bilmirik ki, təhsilin keyfiyyəti 700 ballıq şkala ilə və ən başlıcası isə bir-iki ilin nəticələri ilə ölçülə bilməz:

“Bu məntiqlə yanaşsaq, 2017-ci ildə 15, 2018-ci ildə 29 nəfər 700 ballıq tələbəmiz olub. Onda belə çıxır həmin illər təhsilimizdə keyfiyyət özünün pik həddinə çatıb?! Bəs son illərdə təhsilimiz özünün ən uğursuz illərini yaşayır?! Ümumiyyətlə, keyfiyyətli təhsil nə deməkdir? Hansısa bir konkret nəticədən çıxış edərək, bütövlükdə təhsil sisteminin fəaliyyətini qiymətləndirmək mümkündürmü?! İstənilən halda, bu ili ali məktəblərə qəbul imtahanında abituriyent sayının artımı, ali təhsilin hamı üçün əlçatanlığını təmin etmək, adambaşına düşən ali təhsillilərin sayına görə dünyanın aparıcı ölkələri ilə rəqabət aparmaq baxımından ən uğurlu illərimizdən biri hesab etmək olar. Bununla belə savadsızları-zəiflər, zəifləri-ortabablar, ortababları-güclülər sırasına yüksəltməyin yollarını tapmaq barədə də düşünməliyik. Güclülər üçün isə həmişə bütün yollar açıqdır”.

Günəş Mərd