Vahid BRICS birjasının yaradılması təklif edildi

Rusiya Dövlət Duması milli valyutalar əsasında mal və xammal ticarəti üçün vahid BRICS birjasının yaradılması təşəbbüsünü irəli sürüb. 

TodayPress xəbər verir ki, bu barədə Dövlət Dumasının sədr müavini Aleksandr Babakov məlumat verib.

“Vahid BRICS birjasının yaradılması ölkələrimizin iqtisadi suverenliyi və müstəqilliyinin açarı olacaq” deyə o, bildirib.

Onun sözlərinə görə, belə bir mübadilə BRICS ölkələri arasında ticarəti sadələşdirəcək və optimallaşdıracaq, xərcləri azaldacaq və əməliyyatları sürətləndirəcək. Bu, xüsusilə strateji əhəmiyyətli mallar - enerji, metallar və kənd təsərrüfatı məhsulları üçün vacibdir.

Babakov vurğulayıb ki, vahid BRICS birjası maliyyə sabitliyinin təmin edilməsi və valyuta risklərindən qorunmaq üçün effektiv alətə çevrilə bilər. Bu, dollardan asılılığı azaltmağa və milli valyutalarda ödənişlər etməyə daha çox imkan verəcək. 

Müavinin sözlərinə görə, vahid birja, həmçinin blokçeyn və süni intellekt kimi qabaqcıl texnologiyaların tətbiqi üçün platformaya çevrilə bilər.

Töhfə Səməd