Trampın andiçmə mərasiminin təfərrüatları açıqlandı

ABŞ-nin yeni seçilmiş prezidenti Donald Trampın andiçmə mərasimi protokoldan kənar baş tutacaq və artıq rekord ianə toplayıb. 

TodayPress xəbər verir ki, bu barədə “Kommersant” qəzeti tədbir proqramına istinadən məlumat yayıb.

Qeyd olunub ki, Trampın ikinci andiçmə mərasimi  koronavirus pandemiyası zamanı baş verən Cozef Baydenin sadə mərasimi fonunda təntənəli olacaq.

Mərasim üçün Tramp nüfuzlu Amerika iş adamlarından, o cümlədən İlon Mask, Ceff Bezos və Mark Zukerberqdən 170 milyon dollardan çox pul alıb.

Tramp qələbəsini qeyd etməyə yanvarın 18-də Virciniya ştatındakı Tramp Milli Qolf Klubunda başlamaq qərarına gəlib, burada atəşfəşanlıq və qala şam yeməyi təşkil olunacaq. 

Sonra bazar günü, yanvarın 19-da Arlinqton Milli Qəbiristanlığında Naməlum Əsgərin məzarına əklil qoyma mərasimi, ardınca Trampın qələbə mitinqi və ikinci dövlət şam yeməyi planlaşdırılır.

Bazar ertəsi, yanvarın 20-də, rəsmi andiçmə günü, Tramp Ağ Evdə ziyafətə, çay süfrəsinə qatılacaq, daha sonra seçilmiş prezident və vitse-prezident and içəcək, ardınca isə sələfləri ilə rəsmi vidalaşacaq.

Axşam Tramp paradı qoşunların baxışı ilə açacaq.

Bu dəfə adi protokolun əksinə olaraq, bayramlara səfirlər deyil, xarici ölkələrin rəhbərləri dəvət olunub. 

Günəş Mərd