Şimali Koreya “nüvə təhlükəsi”nə görə ABŞ-ni günahlandırdı

"Birləşmiş Ştatlar nüvə silahı yaratmasa və istifadə etməsəydi, yer kürəsində “nüvə təhlükəsi” anlayışı yaranmazdı".

TodayPress xarici mediaya istinadən xəbər verir ki, bu barədə Şimali Koreya Xarici İşlər Nazirliyinin bəyanatında bildirilib.

Qeyd olunub ki, Koreya Xalq Demokratik Respublikası   başqasının “nüvə təhlükəsini” uydurmağa davam edən və birtərəfli nüvə üstünlüyünü təmin etmək ilə məşğul olan Vaşinqtonun davranışını diqqətlə izləyir.

“ABŞ nüvə silahlanma yarışını təhrik edən və qlobal nüvə münaqişəsi ehtimalını artıran ən məsuliyyətsiz oyunçu və yaramaz dövlətdir” deyə KXDR Xarici İşlər Nazirliyinin rəsmi nümayəndəsi vurğulayıb.

Qeyd edək ki, bundan əvvəl “The New York Times” ABŞ prezidenti Cozef Baydenin gizli strateji nüvə planını təsdiqlədiyini yazıb.  Amerika lideri, həmçinin Rusiya, Çin və Şimali Koreya ilə mümkün nüvə toqquşmalarına hazırlaşmaq üçün göstərişlər verib.

Günəş Mərd