Qırğızıstanda niqab geyməyə görə cərimə tətbiq edildi

Qırğızıstan parlamenti vətəndaşın şəxsiyyətini müəyyən etməyə imkan verməyən geyim geyinməyə görə cərimənin tətbiqini dəstəkləyib. 

TodayPress xəbər verir ki, bu barədə "AKI press" məlumat yayıb.

Hüquqpozmalara dair maddədə qeyd olunur ki, əmək və xidməti fəaliyyətlə əlaqədar geyimlər, habelə tibbi səbəblərə görə üzünü örtmək istisna olmaqla, vətəndaşın şəxsiyyətini müəyyən etməyə imkan verməyən geyim geyinməyə görə cərimə tətbiq edilir.

Bu müddəanın pozulması 20 min som (390,80 manat) cərimə ilə cəzalandırılır.

2024-cü ilin iyununda Qırğızıstan parlamenti ştat ərazisində falçıların və ekstrasenslərin reklamını qadağan edən qanunvericiliyə düzəlişləri təsdiqləyib.

Müvafiq qərarın “xidmətlərin göstərilməsi sahəsində vətəndaşların şüurunun hər hansı okkultiv, sehrli və digər etibarsız üsullarla manipulyasiyasına” qarşı mübarizə məqsədilə qəbul edildiyi qeyd edilir.