Qırğızıstan Rusiyadan vətəndaşlarına qarşı zorakılıqla bağlı izahat tələb etdi

Qırğızıstan Xarici İşlər Nazirliyi Rusiyanın Bişkekdəki səfiri Sergey Vakunovu nazirliyə dəvət edib. 

TodayPress xəbər verir ki, bu barədə məlumatı “24.kg” portalı yayıb.

Bildirilib ki, 11 aprel 2025-ci il tarixində Moskvadakı “Bodrost” adlı hamam kompleksində Qırğızıstan vətəndaşlarının kütləvi şəkildə saxlanılması ilə bağlı məsələ gündəmə gətirilib.

Bununla əlaqədar aprelin 14-də Qırğızıstan xarici işlər nazirinin müavini Almaz İmanqaziyev Rusiya səfiri Vakunovla görüş keçirib.

Görüş zamanı Rusiyaya rəsmi nota təqdim olunub. Notada hüquq-mühafizə orqanlarının keçirdiyi əməliyyatın hüquqi əsasları və vətəndaşlara qarşı zor tətbiqinin səbəbləri ilə bağlı ətraflı məlumat istənilib.

Əgər zorakılıq hüquqi əsas olmadan baş veribsə, məsul şəxslərə qarşı tədbir görülməsi tələbi irəli sürülüb. Qırğızıstan tərəfi həmçinin Rusiya hökumətini bu kimi halların təkrarlanmasına yol verməməyə və ölkə vətəndaşlarının hüquqlarının qorunması üçün operativ tədbirlər görməyə çağırıb.

Bildirilib ki, bu cür insidentlər iki ölkə arasında mövcud olan müttəfiqlik və strateji tərəfdaşlıq münasibətlərinə zərər verə bilər.

Qeyd edək ki, yerli mətbuatın məlumatına görə, Moskvadakı “Bodrost” hamamında aprelin 10-da Qırğızıstan vətəndaşları kütləvi şəkildə, zorakılıq tətbiq olunmaqla saxlanılıb. 

Qiymət Mahir