Qəzzada həlak olan jurnalistlərin sayı 215-ə çatdı

İsrailin martın 18-dən bəri yenidən başladığı hücumlar nəticəsində Qəzza zolağında 2700-dən çox insan həlak olub, 7600-dən çox insan isə yaralanıb.

TodayPress xəbər verir ki, Qəzza hökumətinin mətbuat xidməti məlumat yayıb.

Məlumata görə, mayın 13-də İsrailin Xan Yunusdakı Nasir xəstəxanasına endirdiyi hava zərbəsi nəticəsində fələstinli jurnalist Həsən İslih həyatını itirib. 

Bununla da oktyabr 2023-dən bu günə qədər öldürülən jurnalistlərin sayı 215-ə çatıb.

Qəzza Səhiyyə Nazirliyi bildirir ki, hücum nəticəsində xəstəxananın cərrahiyyə şöbəsində iki xəstə həlak olub, bir neçə tibb işçisi və pasiyent isə xəsarət alıb.

İsrail tərəfi isə hücumların davam etməsini HƏMAS-ın atəşkəs və girov razılaşmasını qəbul etməməsi ilə əsaslandırır.

Hazırda Qəzzaya elektrik verilişi və humanitar yardımın girişi də məhdudlaşdırılıb.

Türkan İsgəndərli