Parisdə polis bıçaqlı hücumda yaralandı

Parisin Yelisey meydanında bıçaqla silahlanmış şəxs polis əməkdaşını yaralayıb.

TodayPress xəbər verir ki, bu barədə ölkənin daxili işlər naziri Cerald Darmanin məlumat yayıb.

"Paris şəhərinin 8-ci məhəlləsində mağazanı qoruyan mühafizəçilərin çağırışı ilə gələn polisə hücum edilib. Hadisəni törədən şəxs təhlükəsizliyi təmin edən polis əməkdaşları tərəfindən dərhal zərərsizləşdirilib" deyə nazir bildirib.

“BFMTV”-nin məlumatına görə, polisi “Louis Vuitton” butikinin mühafizəçiləri çağırıb və bıçaqlı şəxslə bağlı kömək istəyiblər. Polislər mağazaya gələndə kişi bıçağı çıxararaq qaçmağa çalışıb. Təqib zamanı o, arxaya dönüb və polislərdən birinə hücum edib.

Şübhəlinin üzərindən tapılan sənədlər onun Fransada qanuni yaşayan 27 yaşlı əcnəbi olduğunu göstərib.

Nəzrin Cavadzadə