Moskva BRICS-ə qoşulmaq məsələsində Bakıya hər cür kömək etməyə hazırdır : Zaxarova

“Moskva BRICS-ə qoşulmaq məsələsində Bakıya mütəffiq kimi hər cür kömək göstərməyə hazırdır”.

TodayPress xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə bildirib.

Onun sözlərinə görə, hazırda 30-dan çox dövlət BRICS-lə sistemli əlaqələrin inkişafında maraqlıdır.

“Biz hər bir ölkənin suveren istəyinə və bu halda Azərbaycanın BRICS ilə daha sıx qarşılıqlı əlaqələr qurmaq istəyinə hörmətlə yanaşırıq. Birlik getdikcə beynəlxalq əməkdaşlığın daha ədalətli, bərabərhüquqlu arxitekturasının formalaşması istiqamətində çox iş görür” Zaxarova bildirib.

Onun sözlərinə görə, 2023-cü ilin avqustunda BRICS liderlərinin Yohannesburqda keçirilən görüşünün qərarları əsasında üsullar razılaşdırılır.

“İşin nəticələri barədə bu il oktyabrın 22-dən 24-dək Kazanda keçiriləcək sammitdə BRICS liderlərinə məruzə ediləcək, qərarlar hərtərəfli məsləhətləşmələr və konsensus əsasında qəbul ediləcək” Mariya Zaxarova bildirib.

BRİKS-in genişləndirilməsi məsələsi oktyabrın 22-24-də Kazanda keçiriləcək qarşıdakı sammitdə müzakirə oluna bilər.

Azərbaycanın BRİKS-ə qoşulmaq üçün rəsmi müraciətinə assosiasiyanın bu ilin oktyabrında Kazanda keçiriləcək sammitində baxıla bilər.

İyulun 11-də Sankt-Peterburqda keçirilən  BRİKS Parlament Forumunun plenar iclasında çıxış edən Milli Məclisin sədri Sahibə Qafarova bildirib ki, Azərbaycan BRİKS-in tamhüquqlu üzvü olmaq istəyir.

Avqustun 20-də Azərbaycan Xarici İşlər Nazirliyinin mətbuat katibi Ayxan Hacızadə bildirib ki, respublika BRİKS-ə qoşulmaq üçün rəsmi müraciət edib.

Hazırda təşkilatın 10 üzvü var. 

Aynur TAC